uMthunywa
BakaMalandela njengoba lisazi ukuthi igula elidala livame ukunuka amasi, nanku lamhlanje iphephandaba likazulu lize lazo futhi ezimnandi nanku phela liliphathele ijaha mdabuko elingena kuthule umoya. Lindoda icula umculo kamaskandi, kayitshayi nje isiginci iyaphoxa, ekuhlabeleni khona kangikhulumi inyoni yezulu isala phansi.
Mthwakazi kambe kungaba ngubani ongena kunyikinyeke ngitsho lemipankwa emidulini ngaphandle kukaMlamuli Giye Nkomo odume ngokuthi nguMdakomnyama? Woza-ke lendlebe iphephandaba lize lengxoxo emnandi ephakathi kwentatheli yephephandaba likaZulu uCornelius Luphahla (CL) loMlamuli Giye Nkomo (MN).
CL: Akuthi fahlafahla ngamafitshane mfokaNkomo mayelana lembali yakho kanye leyomculo wakho.
MN: Mina ngazalwa mhlaka 16 Lwezi ngomnyaka ka-1982 esigabeni seMtshatshani eNkayi. Ngemva kwalokho ngayafunda esikolo seMtshatshane Primary School. Ngasuka lapho ngayafunda eMpumelelo Secondary School ngayakuma kuFomu 2 ngenxa yokuswelakala kwemali.
Ngo-2002 ngasuka ngaya eBotswana lapho engaqala khona ezokuhlabela lomculi uVusumuzi Nkomo.
Ngalesisikhathi ngangisebenza ukumtshayela ingungu kuphela ngingaculi. Ngemva kwalokho ngasuka ngo-2006 ngaya kweleSouth Africa okuyikho engahlala khona ngaqala ukucula umculo kamaskandi ngo-2010 ngiloNdukuzenxele loNkosi Sizondo.
CL: Tshela umphakathi jahelibanzi ukuthi kungani ukhetha ukuculela kwele South Africa njalo lokhu waqala ukucula sowakhipha amadlalade amangaki?
MN: Okwenza ngikhethe ukuculela kweleSouth Africa yikuthi umculo kamaskandi lo udabuka khona njalo yikho lapho olabalandeli abanengi. Noma kunjalo ngiyabuya ekhaya umnyaka ususiya ekupheleni.
Lokhe ngaqala ukucula sengakhipha amadlalade amabili, elakuqala ngelithi, Kazibuye Emasisweni, esalikhipha siliqembu elithi Izothamlilo eligoqela mina Mdakomnyama, uNdukuzibomvu loNkosi Sizondo ngo-2014 kuthi elesibili ngelithi Izwi Lamakhosi engilikhiphe ngo-2015 ngingedwa sengizibiza ngokuthi nginguMdakomnyama.
CL: Tshela mina mfokaGiye ukuthi abantu bathini ngomculo wakho njalo ukhangelele ukwenzelani uzulu lonyaka?
MN: Abantu bayawujabulela kakhulu umculo wami njalo bangikhuthaza ukuthi ngiqhubekele phambili ngokucula ngoba ngiyabajabulisa. Okunye njalo bathi sebefuna ngibakhiphele elinye idlalade ukuze bathokoze njalo.
Lonyaka-ke ngikhangelele ukukhipha elinye njalo idlalade ukuze ngigcwalise izifiso zikazulu, okunye njalo ngikhangelele ukukhipha i-DVD yedlalade elithi Izwi Lamakhosi, ukuze uzulu azibonele ukudla kwamehlo hatshi ukuhlala esizwa ngendaba.
CL: Ngaphandle kokucula Mdaka akutsho ukuthi msebenzi bani owenzayo?
MN: Ngaphandle kokucula ngiyasebenza lapha eSouth Africa ngoba ngeke ngenelise ukuziphilisa ngokuhlabela kuphela, yikho nje ngisebenza.
CL: Akuchaze ngamafitshane Mdakomnyama ukuthi bunzima bani oyake uhlangane labo ekuculeni njalo nkuthazo bani oyipha abaculi abasacathula?
MN: Ubunzima engiyake ngihlangane labo yikuswela imali yokukhipha i-DVD kanye lokuthi umculo engiwuculayo uthandwa kakhulu lapha kweleSouth Africa okusuka kube nzima ukuthi ngiyecula kithi.
Ngalokhu-ke ngikhuthaza abaculi abasacathula ukuthi babambelele emculweni noma kunzima bengadeli. Okunye njalo ngibakhuthaza ukuthi bahloniphe uzulu ukuze bathole abalandeli babuye benzele uzulu akufunayo.
