uMthunywa
Silo Philisani Moyo
Siyahlangana njalo bafundi kusifundo sethu siqhubeka njalo sikhangele ukuphendulwa kwemibuzo yenzwisisa.
Singakangeni kusifundo akengiqale ngokulikhuthaza njengenjayelo. Kasisebenzeni ngamandla bafundi kuzifundo zethu. Uphelile uZibandlela, zibuze mfundi ukuba wenzeni. Nansi phela inyanga entsha iqalile layo masinyane izaphela sifike njalo isikhathi sokuloba imihloliso yokuphela kwethemu. Labo ke abebengasasebenzi kahle kumbe bengalaleli ababalisi bazakhanya ngokwehluleka kumihloliso.
Kuviki ephelileyo sifunde ngokuphendulwa kwemibuzo yenzwisisa. Usebenzisa lololwazi bala indatshana elandelayo ubusuphendula imibuzo.
UDumolwamadoda wanyenya kancane kancane esekela umduli wesitolo sakoNtuli. Lapha phandle kwakumnyama tshu njalo kuthule cwaka okokuthi ungezwa ngitsho lenalithi iwela phansi. Wathi esemaqondana lefasitela wathalaza emuva laphambili ukuze abe leqiniso lokuba akabonwa muntu. Waqoqoda ifasitela maqondana lesibambo salo kwavuleka isikhala waselivula nango ntshobe phakathi kwesitolo sabantu. Kusenzakala konke lokhu uNtuli wayekhangele ecatshe ngemva kwesihlahla esiseceleni kwesitolo. Uthe ngokubona uDumolwamadoda esephakathi wasethumela umbiko kumapholisa ngomakhalekhukhwini wakhe. Ngokuphazima kwelihlo ayesethelekile amapholisa. Wathi uthi uzama ukuphuma ngefasitela amapholisa atsho esephezu kwakhe zamkhalela izankosi.
Imibuzo
1. UDumulwamadoda wabo-tshelwani?
2. UDumolwamadoda wantshontsha esitolo sikabani?
3. Kutshoni ukuthi ntshobe?
4. UNtuli wenzani ebona uDumolwamadoda esephakathi kwesitolo?
5. Ukuthi ngokuphazima kwelihlo ayesethelekile amapholisa kutshoni?
6. Yiwaphi amabala atsho okufana lokuthi wabotshwa?
7. Iphe isihloko lindaba.
Sihlangane njalo kuviki ezayo bafundi.
