uMthunywa
Indikimba – Ezenkolo, Imbongi nguJerome R Nyathi
Isihloko senkondlo – Bathi ngamadlozi
Abafundi abalandela lamakhasi bazananzelela ukuthi inkondlo siqale ukuyihlaziya kuviki ephelileyo asaze sayiphetha. Ngalokho-ke sizayiphutshisa lamhlanje.
Esikunanzelelayo yikuthi imbongi kayiwathandi kumbe ngithi kayiwusekeli umbono wenkolelo yamadlozi. Ngombono wembongi amadlozi abalethela ukuhlupheka empilweni yabo.
Siphethe lapho imbongi ibuza abantu bonke jikelele ukuthi kanti amadlozi abavelele ngaphi bona.
Imbongi ikhala ngokuthi wona umhlaba ubumuhle kangaka amadlozi engakatshengisi ububi bawo.
Iyaqhubeka imbongi ibuza abantu ukuthi pho kuthiwani njengoba abantu bonke sebesenza intando yamadlozi?
Imbongi itshengisa ukuwacunukela amadlozi nxa ibuza ukuthi wona ayengakhululekanga yini esasemhlabeni? Ibuza lokhu imbongi itshengisa ukuthi amadlozi enza imbongi labanye bawo bengakhululeki ngezinto azifunayo ebantwini.
Imbongi ithi ibeyisithutha yavuma idlozi ingazi phela ibisithi ifuna ukuphila. Lokhu kuveza inkolelo yemadlozini yona ethi abantu baphila ngenxa yawo.
Iyaphambili iveza inzondo yembongi yedlozi layo ngoba iqhubeka ibuza ukuthi : “Kambe lona laliledlozi lisaphila yini?” Umbuzo lo uveza ukunengeka ngedlozi leli elikhanya liyithwalise nzima imbongi.
Ilokumangala imbongi ukuthi into yonke isingamadlozi ibe isibuza ukuthi kambe umhlaba usuyini? Imbongi iphetha ngokuthi mhlawumbe lawo umhlaba usulidlozi, kwazi bani?
Njengoba yonke into eyenzakalayo ikhanya isilawulwa ngamadlozi imbongi kukhanya kuyayicaphula lokho ize ithi: “Satshathin, sicel’ukuphumula bo!” Isibabazo “bo!” siveza ukukhathala ngento ethile.
Lapha imbongi iveza ukukhathala ngamadlozi lawo. Iyaqhubeka imbongi ithi lokho abathi ngamadlozi sekubabonisi imihlolo. Kayivumelani lakho lokho imbongi.
Ithi bathi ngamadlozi kodwa yona ithi kuyini? Kayikuzwisisi imbongi itsho ukuthi iphicekile. Into ephicayo ngengazwisisekiyo.
Iyaphambili imbongi iveza okukade kuyizifiso zayo labanye. Imbongi ithi bebezimisele ukukhula babone okuhle njengabanye njengoba abantu bebabona nje.
Bebezimisele ukukhuleka njengenengi labantu. Kodwa ngenxa yenkolelo zamadlozi imbongi ilomunye umbuzo njalo.
Ithi: “Sithini manje njengoba siyizigqili zamadlozi?”
Ibala elithi sebeyizigqili zamadlozi liveza sobala ukuthi imbongi kayivumelani layo inkolelo yamadlozi. Abantu okuthiwa balamadlozi babonakala begqizile imbongi ibuze njalo ukuthi umhlaba wona ubabona njani njengoba begqize besesabeka ngalolohlobo?
Kuyamangalisa ukubonakala benje ngoba lapho abahamba khona abantu bayanyemukula bebuzane belokumangala.
Iyabuza-ke imbongi ukuthi ngubani ongabakhulula kulelijogwe elinzima kangaka? Ngubani ozabahlenga emalahleni abazokhele wona emakhanda?
Isikubeka sobala imbongi ukuthi ngeqiniso abalakujabula njalo abalazibuse. Abalakujabula lapha emhlabeni ibisisithi imbongi bacela uncedo kubo bonke abalozwelo. Kumbongi amadlozi abathwalise nzima.
