uMthunywa
Blessing Moyo
INHLANGANISO ebona ngezokulima eye-Agritex isixwayiswe abalimi ngendlela zokugcina isivuno nxa bengavuna ukuze singacini sibola kumbe sidliwa ngamagundwane okuyikho okucina kubangela ukuthi isivuno sitshabalale.
UNkosazana Gota Taruda ongumlimisi esigabeni seMangwe uthe abalimi balahlekelwa yisivuno sabo ngesikhathi bevuna kanye lalapho sebesibeka eziphaleni.
“Kubalulekile ukulondoloza uhlonzi lwesivuno ngoba abalimi bandise ukulahlekelwa yimali ngoba isisindo siyabe sesehlile kukanti ukubukeka kwesilimo kuyabe kungasakhangi amehlo abathengi ngenxa yokuthi lapho umlimi ayabe efake khona isivuno sakhe kuyabe kuyindawo engaqondanga ecina iphambanisa isivuno.
Grain Marketing Board
“Amagudwane, izinanakazana, amazolo lokutshisa kulakho ukuphambanisa lakho isivuno umlimi acine elahlekelwa yimali enengi,” kuchasisa uNkszn Taruda.
Uthe amazolo lokutshisa okuyabe kukhona lapho okulesivuno kwenza abeMarketing Board (GMB) bangathathi isivuno somlimi ngoba bethatha isivuno esilohlonzi njalo belomthetho obekiweyo wesimo sesilimo okumele basithathe.
“Kulobumanzi obudingakalayo besilimo kungakho ubumanzi besilimo sakho bungedlula lobo abeGMB kabasithathi ngoba bulakho ukuphambanisa ukugcinakala kwesivuno.
“Okunye okuqakathekileyo yikuba abalimi babe lolwazi lokugcina kuhle isivuno sabo ngoba ubumanzi kanye lokutshisa kwesiphala kuqakathekile kakhulu ekugcineni isivuno isikhathi eside.”
Uthe abalimi beZimbabwe abanengi bavame ukulahlekelwa kakhulu yisivuno sabo ngesikhathi sokususa isivuno emasimini sisiwa esiphaleni langesikhathi sokuthengisa.
Uphethe ngokuxwayisa abalimi ukuthi ukuze bangalahlekelwa yisivuno bangasekeli sihlale kakhulu emasimini.
“Isilimo akumelanga umlimi asiyekelele sihlale kakhulu emasimini ngoba sicina sisonakala njalo umumbu ucina usiba lemitshiphela kanye lezinye izinanakazana, kungakho kuhle ukuthi benze ingalane masinya,” kuphetha uNkszn Taruda.
