uMthunywa
Ncekwenhle Ncube
ABABONA ngezokulima abe-Agritex sebekhuthaze abalimi ukuthi bahlale belungiselele imvundiso yabo njengoba kukhanya lonyaka izulu lizakuba linengi.
Abalimi abalihlekana sebeqalile ukugqibela inhlanyelo phansi ngemva kokuthi izulu selike lathambisa phansi. Kungakho ingcitshi kwezokulima sezikhuthaze abalimi ukuthi badinge njalo imvundiso eyaneleyo.
Ekhuluma lephephandaba likazulu omunye umlimisi weSigodini uMnumzana Mthobi Ndiweni uthe abalimi kumele balungise imvundiso efana lomquba kanye lesiduli ngoba iqakathekile ukusebenzisa ngesikhathi kugqitshelwa inhlanyelo phansi. Uthe labo abenelisa ukuthenga imvundiso etholakala ezitolo kuqakathekile ukuthi bayizuze khathesi kungakafiki isikhathi sokuyifaka ngoba yande ukuhlupha ukutholakala.
“Ababona ngezomkhathi bapha-wule ukuthi izulu lingaba linengi lonyaka. Kuyikho lathi sikhuthuza abalimi ukuthi bagcine imvundiso eyaneleyo. “Abalimi kumele bahlale belomvundiso wokukhulisa lowo-kuvuthisa hatshi ukuthi bathi bazayidinga nxa isifuneka,” kutsho uMnu Ndiweni. Uthe abalimi kumele bazi ukuthi nxa izulu lingaba linengi liyakhukhula ukudla kwezilimo emhlabathini.
“Izulu elinengi lande ukukhukhula ukudla konke okumele kutholwe yizilimo. Yikho nje izilimo ziguquka zibe lithanga ngoba zingasazuzi ukudla okwaneleyo. Ngesizatho leso imvundiso iyadingeka ukuthi ibe khona ukuze izilimo zenze kuhle,” kutsho uMnu Ndiweni.
Uqhubekele phambili esithi abalimi kumele bakhe ubudlelwano labalimisi abaseduze labo ukuze bazuze izeluleko mayelana lezilimo zabo kusaselesikhathi nxa kuthe kwaba lenguquko thize emkhathini. Kanti njalo kuqakathekile ukuthi bazuze isilinganiso semvundiso efunekayo kubalimisi.
UMnu Ndiweni uchaze ukuthi nxa imvundiso ingazange yasetshenziswa ngesikhathi ifunakala kuzenza isivuno sehle kakhulu. Lokhu kungabangela ukufuba kwezilimo okuzenza zingazali ngendlela ezikhangelwe ngayo.
Ubuye wagcizelela ukuthi kuqakathekile ukuthi imvundiso yokuzalisa ifakwe ngesikhathi izilimo sezikhahlela ikakhulu umumbu. Kuzenqabela umumbu ekukhuleni ungazalanga abantu abajayele ukukubiza ngokuthi “yikuwumana”.
