uMthunywa
Thokozile Mbedzi
ZILOKHU zinkemile izakhamizi zelokitshini lePumula East ngemva kokuba elinye inina lithe lithanyela iguma lalo lathi lithi mehlo suka labona isidumbu sosane siphakathi kwamanzi engcekeza yesititshi esidubukileyo abegeleza, olunye unyawo lungekho.
Isehlakalo lesi senzakale mhlaka 23 Ncwabakazi ngehola lika-8 ekuseni.
Kuzwakale ukuba inina elileminyaka engu-57 lathi lithanyela iguma labona isidumbu sosane singelanyawo lapho okwakugeleza khona amanzi engcekeza yesititshi.
Ekhuluma lentatheli kaMthunywa uMeline Khabo uthe balokhu bebona angathi bazavuka ebuthongweni ngalokhu abakubonayo.
“Umakhelwane wethu wavuka njengensukwini waqala ukuthanyela iguma uthe elokhu ephathekile ngokuthanyela wathi ethi mehlo suka wabona isidumbu sosane phakathi kwamanzi engcekeza ayegeleza esedlula ngakwakhe.
“Wahlaba umkhosi owakhanga omakhelwane babuya ngobunengi bafika bavala isidumbu lesi ngebhavu yensimbi. Isidumbu lesi besingela nyawo olwesandleni sokudla njalo besilamanxeba ekhanda lemzimbeni,” kulandisa uNkszn Khabo.
Isikhulumi samapholisa koBulawayo uInspector Abednico Ncube ebuzwa ngodaba lolu uvumile wathi solufikile kibo udaba lwesidumbu sosane esibonakale emanzini engcekeza yesititshi esidubukileyo.
“Sicela ongabe elolwazi lokuthi ngubani umama wosane lolu abikele amapholisa aseduzane laye. Uzulu ukhululekile ukufika enkambeni yethu asiphe lumbiko loba angasithinta kuWhatsApp kunombolo ezithi 0787 928 015,” kuphetha uInsp Ncube.
