uMthunywa
Cornelius Luphahla
INKOKHELI zenhlanganiso ye Livestock Production Department zikhuthaza abalimi beMatabeleland ukuba baqakathekise ukufuya ikakhulu izifuyo ezincane ngoba zanda masinya njalo indawo yabo ilungele ukufuya hatshi ukulima ngenxa yokusweleka kwezulu.
Kubikwa lokhu kungenxa yokuthi indawo le ayila zulu elinengi elivuma ezokulima njalo ayilamikhuhlane eminengi ehlasela izifuyo ngesizatho sokuswelakala kwamanzi kule indawo.
UMthunywa ukhulumisane loMlawuli wale inhlanganiso esabelweni seMatabeleland North uMnumzana Cosmas Muzunde wachaza ukuthi umhlabathi wakulesisabelo muhle ekufuyeni izifuyo ezincane hatshi ekulimeni.
“Indawo yeMatabeleland North ilungele ukufuya izifuyo ezincane ezifana lenkukhu, amathendele, imbuzi, izimvu kanye lezinye izifuyo ezincane ezifana lengulube ngoba ayilazulu elinengi elingenelisa izilimo. Izifuyo ezinkulu ezifana lenkomo zingafuywa kodwa hatshi kakhulu ngoba akula kudla okunengi okungazenela.
“Okunye njalo okudala ukuthi indawo le ilungele izifuyo yikuthi ilotshani obakha umzimba wesifuyo ngenxa yokuthi indawo le ayila zulu elingakhukhula umquba walobutshani njengakwezinye indawo okuna khona izulu elinengi,” kuveza uMnu Muzunde.
Uqhubeke njalo walandisa ukuthi izifuyo ezifuywa kule indawo azihlaselwa yimikhuhlane eminengi njengezendaweni ezilezulu elinengi.
“Njengoba indawo le ilezulu elincane izifuyo ezifuywa kiyo azandisanga ukuhlaselwa yimikhuhlane eminengi ngesizatho sokuthi imikhuhlane eminengi ikakhulu ehlasela eziswini zezifuyo ihlala emanzini ngakho izifuyo ziyithola zinatha emachibini. Ngakho ke ngokuswelakala kwamanzi kule indawo abalimi bandise ukunathisa izifuyo zabo emigodini abanatha khona okulamanzi ahlanzekileyo. Lokhu kusuka kudale ukuthi izifuyo lezi zivikeleke amikhuhlaneni eminengi etholakala emanzini,” kutsho uMnu Muzunde.
Abalimi bakhuthazwa njalo ukuthi nxa bethe balima kubalulekile ukuthi balime inyawuthi lamabele noma nje bekulime mbijana ngesizatho sokusweleka kwezulu kule indawo.
