uMthunywa
LILOLIWE izembe kumqeqetshi weKaizer Chiefs uSteve “Mphathi” Komphela.
Lokhu kukhulunywe nguWilliam “Cool Cat” Shongwe ngesikhathi elumana indlebe lentatheli emiklomelweni yePremier Soccer League (PSL) ngeviki edluleyo.
UKomphela ufike kuChiefs kumasizini amabili adluleyo esuka kuMaritzburg United. KuMakhosi ubezovala isikhala sikaStuart Baxter onqobe izicoco ezine kumasizini amathathu.
UBaxter wadla izicoco ezimbili ze-Absa Premiership, eseNedbank Cup leseTelkom Knockout.
Selokhu kufike uKomphela, iChiefs ayikaze iwine lutho.
Ngesizini yakhe yokuqala uKomphela utshaywe emidlalweni emibili yamanqamu. Ngesizini edluleyo iChiefs iphinde yaqeda isizini ngaphandle kwesicoco.
Bekuqala ukuthi iChiefs iqede amasizini amabili elandelana ingazange ithole lutho.
UShongwe owayengunozinti weChiefs ukubeke kwacaca ukuthi uKomphela kumele anqobe izicoco kusizini entsha nxa efuna ukugcina umsebenzi wakhe njengomqeqeshi weqembu.
“Le isizini yiyo ezocacisa ngekusasa likaKomphela. Lamanje ngisamangele ukuthi isivumelwano sakhe leqembu asizange siqanyulwe ngemva kokuqeda amasizini amabili elandelana engazange anqobe lutho kuChiefs, okuyinto engakaze yenzeke kuleliqembu.
“Ngiyethemba ukuthi loSteve uzokwazi ukuvuka azithathe ngoba kungenjalo usenkingeni,” kutsho uShongwe.
Isivumelwano sikaKomphela leChiefs sivele siyaphela ekupheleni kwesizini elandelayo.
“Nxa izinto zibheda kukhangelwa umqeqetshi kodwa omunye umbuzo okumele sizibuze wona yikuthi ulalo yini iqembu.
“Mhlawumbe yikho kungelula ukuthi baxotshe uKomphela ngoba bayazi ukuthi labo balesandla enkingeni ezibhekane leqembu.
“Abanye abantu kuChiefs ngiyakhuluma labo futhi bayatsho ukuthi labadlali bayazivumela bona ukuthi bamenzele phansi uSteve. Lokho nxa kungenzeki kulisizini angimboni ehlala,” kutsho uShongwe.
Kusenjalo inkunzi zaseSoweto iOrlando Pirates sezihwatshe i-kit entsha ezagqokwa mhla iqala ukuncintisa kuligi yeAbsa Premiership ka-2017/18. — Ubulembu
