Eze #SWG, MIB3 leBekezela Concert!

27 Dec, 2018 - 00:12 0 Views
Eze #SWG, MIB3 leBekezela Concert! Mzoe 7

uMthunywa

Vusumuzi Ndlovu
Samukela abalandeli labaculi ngokufanayo. Lapho okulekhefu khona kuba lomculo, njalo akuswelakali omabonakude. Ngempucuko zakulezinsuku lokhu kokuthathu ngeke kwehlukaniswe, kuseqenjini elilodwa ebulenjini kuWhatsapp, khepha i#SWG (Same Whatsapp group).

UMzobanzi Paul Mlauzi, odume ngelokuthi Mzoe 7, usesiphakulele ingoma elesihloko esifanayo uSame Whatsapp Group. Lingoma uyisebenze loMurphy Cubic, eTizzie Studios yaphinda yaqondiswa ngumculi UCal_Vin.

UCal_Vin ubelomcimbi we-MIB3 (Made In Bulawayo3) mhlaka 15 Mpalakazi, okulilanga azalwa ngalo njalo.

Sizakuxoxa ngaye phambili, okwakhathesi asiphindele ku #SWG.

UMzoe 7 kulingoma uxwayisa abantu abafika endaweni babelomkhuba wokufaka imibono yabo lokuguqula izinto lapho okungadingeki khona. Ukhuthaza indlela zokuvimba abantu abanjalo ngoba uthi babulala ithemba ebantwini. Uthinta ngento ezinengi ezibalisela imizwa yakhe ngomsakazi uKVG njalo ukhuthaza ukuncoma lokuthanda abesifazana bethu.

Umlingiswa lomahlekisa uMai Titi laye uyanconywa ngokugcina isizwe sijabulile ngemisebenzi yakhe. UMzoe njalo uncome loCal_Vin ngomsebenzi wakhe womcimbi weMIB3. UMzoe ubevakatshele eMasvingo ngomculo wakhe, lapho afike wajabulisa isizwe ngemva kokuphenduka ezoxhasa uCal_Vin ngomsebenzi ngempelaviki.

UCal_Vin, osungule idlalade lakhe lalonyaka uNhliziyo enyangeni edluleyo, ube lomcimbi eLuveve lapho abaculi abatsha labadala abaxhase umsebenzi wakhe wokuthuthukisa umculo wakhe lowabanye jikelele.

Bekukhona abaholi labomhlonitshwa akade bemenyiwe kwezomculo, intathelizindaba kanye lomphakathi.

Kuhle ukubona abaculi besekelana ukukhulisa imisebenzi yabo.

Phetsheya sitshayele ihlombe uBekezela, laye obe lomthimba wakhe iBekezela Birthday Concert ngempelaviki efanayo. Ngemifanekiso esiyibonileyo, kukhanya kube mnandi lapho njalo kukhomba ukuba umsebenzi lawo uqhutshwe ngendlela ehlabusayo. KuWhatsapp yakhe, utshengisele ukubonga kakhulu ngokuphumelela komthimba wakhe ngendlela ephakemeyo.

UBekezela nguye olesicoco sengoma yalonyaka ese #RoilBulawayo Arts Awards ngengoma yakhe uBekezela.

Umabonakude wayo ulesiphalaphala esinguMbo Mahocs, olingisa enguChiChi kumdlalo weScandal ophuma ku e-TV eMzansi Africa.

Libe lekhefu lokujabulela umnyaka omutsha elihle njalo ngilifisela umnyaka omutsha olitshukela.

Balandeli siyabonga usekelo maviki wonke!

Share This:

Sponsored Links