uMthunywa
KWATHI kuqalisa ukuna kwezulu nyakenye, zabotshwa kwalinywa njengenjwayelo, labuya ilanga latshisa kwatsha okwakulinyiwe emasimini, insimu zaphenduka zababomvu gebhu, ikakhulu emhlubulweni weMatabeleland. Ngathi ngibuza omunye umngane wami wathi lakhonale eMashonaland lakho abajwayele ukuvuthisa kwehlula endaweni ezinengi.
Lonyaka sizakubona okwabonwa yingidi ithwele ilahle. Indlala isiqoqoda emzini eminengi kuthi lezifuyweni utshani abusekho emadlelweni amanengi lamadamu asesele lamanzi amalutshwane.
Abantu ezabelweni ezinengi sebeqalile ukuya emilageni bezama ukuphilisa izifuyo zabo. Ngahleka omunye undoda ethenge impuphu yakhe umgodla we-20kg wawugoqela ethi kafuni ubonwe ngomakhelwane bakhe ngoba elezikwelede zabo zempuphu funa bahle bamnqamekele.
Siyathaba ngoba uMongameli wethu welizwe usesithembisile ukuthi akula muntu ozakufa ngendlala abantu bazanikwa ukudla. Aluba lezikolo lazo ziyanikwa ukudla ukuze abantwana banikwe labo ukudla bekhonale ezikolo ukuze benelise ukuqaphela ezifundweni zabo ngoba besuthi.
Emakhaya amanengi vele sekudliwa kanye ngosuku phela, nxa ufuyile uzathi ukuthengela inkomo isikuba uthi ukuthenga impuphu kucina kusiba ngumthwalo onzima njengoba lemali yakhona ingabambeki.
Endaweni ezinengi bekukhankaswa ukuthi inkomo esezikhulile kumbe imbuzi zikhitshwe emhlambini zithengiswe funa kube yizo ezizaqala ukucuba ngendlala yokufiphala kwamadlelo.
Pho-ke abansundu abanye abakutshayi indiva lokhu, umuntu uyabe elokhu ezigqaja ngenani lezifuyo kanti kayisiwo mnyaka walokho. Lonyaka kufuna ukukhalipha.
Inengi labantu abavunanga lutho sibi sekhabe, abanye azange balidle lonyaka elivela emasimini mhlawumbe badle awokuthenga avela ezivandeni ezithelelwayo. Lemadolobheni labo bakhala ngendlala ngoba isimo sibi, nxa uvakatshela umuntu edolobheni kumele ubone ukuthi awudli kakhulu ngoba bangakhala ngawe bacine bethuma okungokhekhe ukuthi kukubuze ukuthi uzabuyela nini lapho ovela khona.
Lokhuyana okwakudala ukuthi umane uvakatshe ungaphathanga lutho sokumele kuphele, kumele lawe kwelinye ilanga ukhwathaze uthenge isinkwa kumbe isitshebo ngoba kubi ezindlini, kudinga ukuthi kuncediswane.
Ayixabene.
