uMthunywa
Silo Mehleli Dube
KULEZINTO ezingakhulunywa ngumuntu ethi uyadlala. Into yakhona kanti vele uMvelinqangi ukuhlele ngaleyo ndlela abantu bakuzonde uze uyekufa.
Kwesinye isikhathi inkulumo yakhona ixabanise umdeni bafungelane ijoyi loba sebezama ukukhumisana umlotha kwehlule. Indoda ezala mina yona engasekho emhlabeni yayihlezi iqonqosela ukuthi nxa kugulwa akumelanga ukuthi usiyabona isigulane ukhulume amazwi afana lokuthi kusasa angavuka ephila, kumbe ukuthi elalamuhla lingatshona kungenzeka ngendlela oyabe ukhulume ngakhona bahle bakuthathe njengomuntu akade ufisela ukuthi isiguli sife loba nje labo kade bezibonela ukuthi kwembulwa kwembeswe ngoba kwesinye isikhathi laso isigulane siyabe singasadli khona lokunyakaza sisehluleka, kodwa ipha amazwi okuthembisa.
Lasemtshadweni inkulumo ezifana lokuthi uzibani utshade lewule, umtshado uzabhidlika ngeke baguge bonke, funa kwenzeke basuke bakubize umthakathi sekungani nguwe olesichitha.
Zinengi imbangela zokuthi abantu behlukane, bakhona abazathatha inkulumo yakhe bayiqinise njalo bayiphendulele bayifake lamasawudo uthole umdeni usuxabana okwamagama wena ubusithi uyazikhulumela nje ungajonge lutho.
Ikakhulu emfeni kubalulekile ukuthi umuntu akhethe amazwi, inkulumo yokuthi uyakwazi ukuthi umuntu ubulewe ngubani uboziqaphela ngaphandle nxa umbonile emgwaza.
Minengi imideni engakhulumisaniyo emveni kokuthi sokubhubhe ilunga lomdeni mhlawumbe litshabalele engozini yemota, isimanga befe bebanengi kodwa uzwe sekuthiwa ubulewe nguZibani banyana okwengozi yemota kuphoselwe le eceleni, uxabane umdeni kufungelwane ngento abangelaqiniso layo kusukela enkulumeni eziphongukhulunywa mahlayana.
Kubalulekile ukukhetha amazwi ikakhulu nxa usesimeni esiqanjwe ngaphezulu funa uxabanise abantu, ngoba abanye bacina sebesilwa langezandla kumbe badingelane onyanga mthakathi. Ayixabene.
Umlobi ungamthinta ku:0714355641.
