uMthunywa
YiNtatheli kaMthunywa
KWENZAKALE insumansumane yendaba elokitshini leNtumbane ngemva kokuba kubonakale amatshe ejikwa emini libalele okudale ukuthi izakhamizi zicabangele ukuba ngondofa abebejika amatshe la njengoba ebengabonakali lapho avela khona.
Indaba le yenzakale kuviki ephelileyo lapho ondofa abatshaye khona indlu eseNtumbane elekheli elithi 30594 yaphelelwa ngamafasitela kwaze kwabaleka ngitsho labantu abahlala lapho, uMthunywa uyakuveza lokhu namhlanje.
Kuzwakale ukuthi ondofa laba baqala ukutshaya indlu le ekuseni kwaze kwayatshona ilanga noma nje kwakubonakala amatshe ephambana emoyeni.
UMthunywa uvakatshele kule indawo wakhulumisana loNkosazana Raviro Mufara ongesinye isakhamuzi sakule indawo, ubikele intatheli ukuthi indaba le uyayazi njalo laye wazibonela ngawakhe amatshe la ejikijelwa endlini le.
“Lokhu ngathwetshulwa yingwe kangikaze ngibone amatshe abonakala ephoswa kodwa owaphosayo engabonakali. Isimanga njalo yikuthi ayeqophe indlu lapho okuhlala khona uTendai Kamfumvuti okwenza njengezakhamizi sangathandabuzi ukuthi ngundofa owayejika amatshe la njengoba ayesuka egcekeni nje aze aqeda amafasitela,” kutsho uNkszn Mufara.
Esinye njalo isakhamuzi sakule indawo esingathandanga ukubethwa ngegama sichaze ukuthi ondofa laba bengabe bengabesinye isihlobo sakule indlu.
“Ngokubona kwami ondofa laba bengabe bathunyelwa kule indlu ngoba lomninindlu wathutha kuyo ngoba ethi akuhlaleki kusukela esanda kuyithenga sokuze kulamuhla ihlala amaloja,” kutsho lesisakhamuzi.
UMthunywa wenelise njalo ukukhulumisana loNkosazana Nomvelo Sibanda onguye ohlala kule indlu njalo owayekhona mhla kutshaywa indlu le wachaza ukuthi laye wayengaboni okwakutshaya amafasitela.
“Ngangizihlalele endlini ngezwa amatshe etshaya indlu ngaphuma phandle ngabona engakhanyi lapho ayevela khona ngasengibaleka ngayahlala komakhelwane. Amatshe la aqhubeka etshaya abulala amafasitela aze ama ukuphoswa ntambama kodwa ngeke ngitsho ukuthi kuyini okwakutshaya ngoba angikubonanga,” kutsho uNkszn Sibanda.
Imizamo yokukhulumisana loMnumzana Tendai Kafumvuti ongomunye njalo oloja kule indlu yehlule ngoba ucingo lwakhe lwalile ukungena.
