uMthunywa
Cornelius Luphahla
ZIDLELA evalweni izakhamizi zelokitshini leCowdray Park edolobheni lakoBulawayo nanko phela ziganyulwa njalonye yizigelekeqe emgwaqweni asebawunika igama lokuthi nguMlava Road.
Kubikwa izigelekeqe lezi sezileminyaka emithathu zaqala ukuhlasela abantu kule indawo nxa bethe bahamba ebusuku njalo ngemva kokubulala kwazo uNkosikazi Ivy Sibanda zibuye njalo zatshaya uMnumzana Jacob Nkomo ngeSonto ntambama wasila ngokulambisa.
Kuzwakale ukuthi umgwaqo lo ubizwa ngokuthi nguMlava Road ngoba abathandanayo kulelilokitshi babonakala kulo umgwaqo ntambama njengoba kungelazindlu eduzane lawo.
UMnu Nkomo ubikele intatheli ukuthi wahlaselwa ntambama evela thenga impuphu batshaya bamlimaza ekhanda wasizwa yikubaleka kodwa kabamthathelanga lutho.
“Mina ngithe ngivela thenga impuphu eterminus ilanga lisanda ukutshona ngahlangana lamadoda amabili eduze lomgwaqo bangivalela indlela bethwele insimbi. Ngalahlela phansi impuphu bangitshaya ngensimbi ikhanda ngaphaphatheka ngaze ngayazibona sengidlulile endlini yami.
“Noma nje ngavukela esibhedlela kodwa kathesi sengisilile. Okwangimangalisayo yikuthi ekuseni ngathi sengisiyakhangela ngathola ukuthi impuphu yami kabayithathanga,” kuchaza uMnu Nkomo.
UMnumzana Clifford Dube oyisakhamuzi sakulelilokitshi uthe bacabangela ukuthi izigebengu lezi zijonge ukuthatha izitho zabantu yikho zingatshontshi lutho ebantwini njalo amapholisa bangaze bawatshele kawenzi lutho.
“Izigebengu lezi ngokubona kwami ziyabe zifuna ukubulala abantu zithathe izitho zabo kuphela. Ngitsho ngoba bonke abantu ezibahlaselayo kazibathatheli lutho lalabo abaziphunyuka batshiye impahla zabo baziyekela. Lokhu kugcwaliseka ngokuthi uMaSibanda utholakale engelamazinyo okuchaza ukuthi bezifuna amazinyo akhe.
“Okuzwisa ubuhlungu yikuthi singaze sibikele amapholisa kawazihluphi ngakho njalo ebusuku ayabe ezihlalele ebhawa eterminus okungelazigangi khona kulokuthi abhode adinge izigebengu,” kutsho uMnu Dube.
UMthunywa ukhulumisane loNkosazana Siphetho Msimanga wathi sebethwele nzima ngezigebengu lezi ngoba sezihlasela abantu ilanga lisanda ukutshona njalo bacabangela ukuthi zihlala ezindlini ezintsha.
“Sesikhathele ngezigebengu lezi ezikule indawo ngoba sezihlasele noma ilanga lisanda ukutshona. Sesize sisesaba ukuyathenga ezitolo ze terminus ngoba ukuze siyefika khona sidlula ku mlava road.
“Njengezakhamizi zalapha sicabanga ukuthi izigebengu lezi zihlala ezindlini ezintsha eSigoqdweni yikho nje zingaziwa muntu,” kutsho uNkszn Msimanga.
UKhansila wakulelilokitshi uMnumzana Collette Ndlovu ubikele intatheli ukuthi sebekhulumisane lamapholisa abancedisa ukubamba izigebengu njalo abantu kabangahambi ebusuku kule indawo.
“Sesikhulumisane lamapholisa ukuthi asincedise ukubamba izigebengu lezi ezihlasela abantu kule indawo. Okunye njalo ngikhuthaza izakhamizi ukuthi zingabohamba ngale indlela ebusuku kungcono zibhode khatshana okungelazigebengu khona,” kutsho uKhansila uNdlovu.
Imizamo yokukhulumisana lesikhulumeli samapholisa edolobheni lakoBulawayo uInspector Siphiwe Makonese yehlule ngoba kuthwe kakho ewofisini njalo ucingo lwakhe alubanjwanga muntu.
