uMthunywa
Ncekwenhle Ncube
AMAZINYANE embuzi lezimvu asengozini yokuhlaselwa yimikhuhlane eminengi ikakhulu endaweni ezifana leGwanda kungakho abalimi bakhuthazwa ukuthi bawavikele ngokuwahlaba.
Abalimi abanengi abasuka endaweni ezitshiyenyo bakhuthazwe ukuthi bavakatshele odokotela bezinyamazana ukuze bathole imithi yokuvikela amazinyane kumikhuhlane ewahlaselayo.
Ekhuluma lephephandaba likazulu uMnumzana Methuseli Mahlangu uthe usephelelwe ngamazinyane amanengi embuzi kodwa akazwisisi ukuthi abulawa ngumkhuhlane bani.
“Sengiphelelwe ngamazinyane embuzi amanengi kodwa angazi ukuthi ahlaselwa ngumkhuhlane bani.
Aqala ngokuqhuqha kuthi ngemva kwalokhu abe sesifa,” kutsho uMahlangu.
Ubuye waveza ukuthi sebeke bazama ukuwanathisa intolwane yentaba becabanga ukuthi mhlawumbe ngamawemusi kodwa akula mehluko obakhona kumpilakahle yawo.
UMnumzana Bekithemba Dube wesigabeni seBeula, eKezi uthe awakhe amazinyane avuka efile nje kuphela.
“Amazinyane ami avuka efile kodwa angikwazi ukuthi abulawa yini.
“Angizwisisi ukuthi kubangelwa yini ekuqaleni besicabanga ukuthi ngumqando kodwa isikhathi somqando sesedlule kodwa alokhe esifa lakhathesi.”
Abalimi abalihlekana abaxoxe lentatheli bachaze ukuthi bona emakhaya bahlala khatshana labalimisi ngakho bacele ukuthi nxa abalimisi bekhona bebavakatshele noma yisiphi isikhathi hatshi ukubuya kuphela ngezikhathi zokulima.
UDokotela wezifuyo uMbuso Moyo uthe kulezinsuku kuqhamuka imikhuhlane eminengi ehlasela izifuyo.
Ngakho abafuyileyo bakhuthazwa ukuthi nxa bethe babona inguquko kuzifuyo zabo bagijimele kwababona ngempilakahle yezifuyo.
“Abalimi abafunde ukuxoxa lezisebenzi zeVeterinary Services eziseduze labo. Kulilungelo labo ukuyazwisisa mayelana lokufuya langemikhuhlane engahlasela izifuyo zabo.
“Sikhuthaza ukuthi nxa bethe babona izifuyo zigula kumbe kulezibonakaliso abangazizwisisiyo bagijimele endaweni eziseduze ezibona ngezifuyo abangathola khona usizo,” kutsho uMnu Moyo.
Ukhuthaze abalimi ukuthi bahlabise amazinyane abo masinyane ukuze bawavikele emikhuhlaneni engaqhamuka.
