uMthunywa
Mthwakazi ondlela zimhlophe njengoba lisazi ukuthi iphephandaba likazulu kalideli ukujabulisa umphakathi nanku phela lakule iviki lize lazo lithe lizojabulisa uzulu njalo ngejaha elimajaha mabili elicula amaxhegu akhumbule esakhula, izalukazi zikhumbule ngethuba zisasengamantombazana zisamekeza.
Mthwakazi omuhle kambe kungaba ngubani ojabulisa abantu baze bakhale ngaphandle kukaKhulekani Bethule owaziwa ngokuthi nguKhuxxman.
Kayiculi nje lindoda ifefe lingumfana, isiginci sona kangikhulumi, isitshaya kuhele kozeleyo. Qhubeka ufunda uzwe kabanzi ngomculi lo kungxoxo phakathi kukaKhulekani Bethule (KB) lentatheli yephephandaba likazulu uCornelius Luphahla (CL).
CL: Jahelibanzi akuchazele uzulu mayelana lembali yakho kanye leyomculo wakho.
KB: Mina ngazalwa mhlaka 5 Mpalakazi ngo1975, esibhedlela seMpilo edolobheni lakoBulawayo. Ngakhulela lapha koBulawayo ngasengisiyangena uGiredi 1 eSt Partricks Primary School ngasuka njalo ngayafunda eRangemore Primary School ngaqedisa uGiredi 7 wami eFusi Primary School khonapha koBulawayo.
Ngaqhubekela phambili ngezifundo zami ngayangena uFomu 1 ePhumula High School khonapha koBulawayo ngaze ngaqeda uFomu 4.
Ngemva kwalokho ngasuka lapha ngaya kweleSouth Africa okuyikho engaqala khona ukuhlabela ngihlangane lamanye amaqembu atshiyeneyo. Inengi lamaqembu la engangihlabela lawo kwakungacula iRaggae. Lami ngaze ngaqala ukuzihlabelela ngedwa ngo2001.
CL: Tshela uzulu jahelidala ukuthi lokhu waqala ukuhlabela sowakhipha amadlalade amangaki njalo sowathola imendulo ezingaki?
KB: Mina njengomculi oselesikhatshana ngaqala ukuhlabela sengakhipha amadlalade ayisithupha. Ngalokhu idlalade lami lakuqala ngelika-2002 elithi Ma Africa, kuze elika-2004 elithi Ngizohamba, kuze elithi Let’s Unite elika-2006, kuze elithi-50-50 elika 2007, kulandele elika-2009 elithi Liphindile iNyasaland, kuphethe ngelika-2013 elithi Vumelan’ Isangoma noma nje kunjalo ngemva kwamadlalade la bengisenelisa ukukhipha ingoma ezinye ezingayisiwo madlalade.
Kusukela ngesikhathi ngiqalisa ukuhlabela sengathola imendulo eyodwa engayithola ngo-2014. Njengoba nje sengike ngathola imendulo kutsho ukuthi ngisazoqhubekela phambili ngizithola ngoba lokhu ngiqhubekela phambili ngicula.
CL: Akutsho jahalakithi abantu bathini ngomculo wakho njalo ukhangelele ukwenzelani uzulu lonyaka?
KB: Abantu umculo wami bayawujabulela kakhulu njalo bayawuncoma bangikhuthaza ukuthi ngiqhubekele phambili ngicula ngoba ngiyabajabulisa. Ngalokhu-ke lonyaka ngikhangelele ukukhiphela uzulu elinye njalo idlalade elomhlaba ukuze ajabule kuze kuyethwasa umnyaka.
Ngikhangelele njalo ukujabulisa uzulu ngokumenzela ama-shows ukuze azibonele ngamehlo umsebenzi lo engiwenzayo ukuthi umnandi.
CL: Njengomculi bunzima bani oyake uhlangane labo njalo nkuthazo bani oyipha abaculi abasacathula?
KB: Njengomculi ubunzima engiyake ngihlangane labo yikuthi ngathwala nzima ukuze ngakhe ibizo lami ngaziwe ngumphakathi. Okunye njalo yikuthi ngisuka ngikhathazwe luhlupho lokuswela imali yokuzithuthukisa.
Ngalokhu-ke ngikhuthaza abaculi abasacathula ukuthi baqhubekele phambili ngomsebenzi wobuculi noma nje kunzima bengadeli. Okunye njalo ngithi oculela ukuthola udumo ngeke aluthole kodwa oculayo kufanele asebenzise isiphiwo sakhe ukuze aphakame emphakathini.
