uMthunywa
Ethel Ncube
KULEMULI yeJosiah eZvishavane ephose yabulala elinye ilunga lemuli yalo ngokuzama ukulitshisela endlini kubangwa ilifa.
Indaba le yenzakale ngeviki ephelileyo lapho umamangala uInnocent Taru oleminyaka engu-23 yokuzalwa aphaphame indlu alele kiyo isisitsha wathi ezama ukuphuma phandle wehluleka ukuvula waze wawuthuza waphuma wafica ubotshwe ngewaya.
Kuvele ukuba umamangala labafowabo uAdmire Taru loGivemore Dube babanga ukuthi ngubani okumele ahlale emzini owatshiywa ngabazali babo ababhubhayo.
Kuzwakale ukuba ebusuku kwafika umuntu wakhiya isivalo phandle ngewaya andubana ayilumathise.
Isikhulumi samapholisa eMidlands uInspector Emmanuel Mahoko uthe bamukele umbiko wendoda ephose yatshela endlini.
“Samukele umbiko wendoda ephaphame ebusuku indlu ebilele kiyo isisitsha. Kukhanya uInnocent Kare wathi elele waphaphama esebona kulelangabi lomlilo wathi ezama ukuvula isivalo wehluleka waze wasithuza waphuma
“Uthe esephandle wananzelela ukuthi isivalo sasibotshwe ngewaya ukuze angaphumi.
“Sicela ongabe elolwazi ukuthi ngobani abalesandla kusenzo lesi abikele amapholisa aseduzane laye kumbe abhale incwadi aphosele ebhokisini lamapholisa. Sixwayisa uzulu ukuba nxa elohlupho kabaluqede ngokukhulumisana nxa kusehlula bangadinga ongabancedisa ukuthi baxazulule ingxabano ephakathi kwabo.
“Ukusebenzisa udlakela kulicala njalo kucina kulahleka impilo,” kuphetha Insp Mahoko.
