uMthunywa
Pumulani Mpofu
INDLELA abazali abakhulisa ngayo abantwana isibadukisile njalo sokusenza ukubana ikusasa labo litshabalale kusweleke umuntu ongabaqondisa abatshengise indlela eyiyo yokuphila. Inengi labazali kalisanakekeli abantwana babo ngendlela. Obaba bazitshonela emabhawa benatha utshwala belibala ukubana yibo ongqongqotshe okumele bahambe phambili ekulungiseleni izingane zabo incwadi zokuzalwa.
Inengi labomama selitshona lihlezi, bathi ngenxa yokuthi imali ayikho sebezihlalela bayekele ukuhambisa abantwana esikolo bethi ngoba bona baswela imali. Abazali abenza nje izikhathi ezinengi uthola ukubana labantwana babo abalazo incwadi zokuzalwa. Inengi labantwana babo abasayi lesikolo ngenxa yokusweleka kwezincwadi zokuzalwa njalo abazali babo bahle bavike ngokubana abalayo imali yokubahambisa esikolo. Kusuka kube lusizi ngoba ikusasa labantwana lihle libhidlike ngenxa yabazali babo abehluleka ukubana beqakathekise amalungelo abantwana.
Kule iviki ngithole ithuba lokuxoxisana lomama obizwa kuthiwa nguSilibaziso. USilibaziso uthethwe nguDlodlo osebenza engumantshingilane edolobheni laseGwanda. USilibaziso-ke ulabantwana abayisikhombisa. Phakathi kwabo bonke munye kuphela olencwadi zokuzalwa. Kulaba abayisithupha abathathu balawo ama-health card kanye lama birth confirmation record kodwa kazange abathathise incwadi zokuzalwa ngoba yena esithi katholi isikhathi sokubana ayebathathisa njalo lemali yokubafundisa kalayo kodwa umkakhe uyasebenza. Kulaba abanye abathathu balawo ama-health cards kodwa-ke ama-birth confirmation records abo asuka ke alahleka yikho-ke osokudala ukubana bangathathelwa incwadi zokuzalwa. Indodana yakhe endala isileminyaka engamatshumi amabili kazange aqede isikolo ngoba engelayo incwadi yokuzalwa njalo akenelisi ukubana adinge umsebenzi ngenxa yokuswelakala kwencwadi yokuzalwa.
USilibaziso udlule eTrinity ethi ufisa ukwazi ukuthi angathathela njani abantwana bakhe incwadi zokuzalwa.
Njengogatsha olunakekela kakhulu amalungelo abantwana sahle savela-ke sathi kaze lamaphepha wonke abantwana bakhe. Samnikeza imali engange $30 ukubana kaqonde eMpilo ayethatha ama-birth record. USilibaziso wenelisa-ke ukuthatha ama-birth record abantwana bakhe. Samqonqosela ukubana kusisa avukele amahofisini ayethathela abantwana bakhe. Ngemva-ke kweviki samtshayela ucingo sibuza ukubana sewatholile ama-birth abantwana kodwa ke wathi cha kakasitholi isikhathi sokubana ayethathela abantwana bakhe izincwadi zokuzalwa.
Indlela abazali abaziphatha ngayo iyaveza ukubana kabaqakathekisi amalungelo abantwana babo njalo abanaki ukubana ikusasa labo lizabanjani. Silethemba ukubana njengenhlanganiso yase Trinity Project sizamzama uSilibaziso aze acine esenelisile ukubana alungisele abantwana bakhe ikusasa elihle lalobanje inengi labo selidlulelwe yisikhathi sokubana baye esikolweni.
Kasihlanganeni njalo kuviki elizayo.
Umlobi utholakala kukheli ethi [email protected] loba kunombolo ezithi 0773195055. Laku www.trinityproject.biz