uMthunywa
YiNtatheli kaMthunywa
IQEMBU le-Unity Village FC eselitshiyane lokudlala inguqu yobungane emahlangeni langena “engcono”, iBulawayo Amateur Football League (Bafa), libika ukuthi lizangena kuDivision One kumasizini amabili azayo.
Besokuyiminyaka elitshumi ithimu yeUnity Village isadalala kumidlalo yobungane. Kumidlalo le abakhokheli balithimu babika ukuba bebengatholi lutho kukanti labadlali babo bebelahlekelwa lithalenta ngenxa yokudlalela kunkundla eziphansi.
Umanenja weUnity Village uMartin Chingono uthe iqembu lakhe lihlale okwesikhathi eside kunguqu yobungane ngakho sekumele liqale ukuncintisa kusigaba esiphezulu.
UChingono uthe sebenanzelele ukuthi abadlali babo balesiphiwo somdlalo kodwa ababonwa muntu.
“Sesitshiyane lokudlala inguqu yobungane. Sidlala kuligi yeBafa khathesi ngoba inhloso yethu ngeyokuphakama siye ku-Division One kuminyaka emibili elandelayo.
“Inkokheli labadlali bethu bayavumelana ukuthi ukutshintsha iligi kuzanceda ngoba ithimu isizabonakala ukuthi ilethalenta. Abadlali bazathola amathuba, lethimu iphakamise ibizo layo lokuthuthukisa abalandeli.”
Umaneja lo uthe okubafuqele kuligi yeBafa yikuphumelela kweqembu lekhansili iBulawayo City FC. Iqembu leli selitshibilika ku-Division 1 ngemva kokukhukhula amanye amathimu enkundleni zika-Division 2 ngomnyaka ophelileyo.
“Bakhona ababecabanga ukuthi asisoze sisuke kunguqu yobungane. Sesikwenzile lokho ngokungena kuBafa.
Okwenziwa yiBulawayo City lathi sizakwenza,” nguChingono lo.
Kusenjalo uOmega Sibanda, umsekeli kamongameli wenhlanganiso yeZimbabwe Football Association (Zifa ukhuthaze iUnity Village ukuthi iqalise ukuzwisisa imithetho yenguqu njengoba isingena kumaligi alohlonzi.
“Kuyathabisa ukuthi iUnity Village isicabange ukuphakamisa umdlalo wayo. Ngicebisa ithimu le ukuthi izwisise okumunyethwe yimthetho yenguqu.
“Qhubekani ngokukhangelela phambili ukuze ithimu ifike kusibanga esiphezulu somdlalo.”
USibanda, ohlonitshelwa ukuba ngumqali wesiziba kwezokuthuthuka kwenguqu koBulawayo, wayengomunye wenkokheli ezasungula amathimu anjenge-Unity Village.
