uMthunywa
ILIZWE leSaudi Arabia lizakuba lokhetho lwakuqala kulelo oluzavumela abesifazana ukuba bavote njalo bavotelwe phezulu kokuba yilo lodwa ilizwe ebeselisele lingavumeli abesifazana ukuba bavote.
Kubikwa ukhetho lolu luzakuba khona ngoMgqibelo kuyonale iviki lapho okuzabe kungokokuqala ukuba abesifazana bavote babuye bavotelwe.
Abesifazana ababhalisileyo ukuba bavotelwe kulolukhetho kubikwa bangu-978 kuthi abesilisa bangu-5 938.
Ababhalise ukuba bavote kwabesifazana kubikwa bangu-130 000 kuthi abesilisa bangu-1, 35 miliyoni.
Ukhetho lolu oluzakuba khona kulelilizwe kubikwa ngolwekhansili njalo amakhansila la azabe elamandla amancane kuHulumende njalo ukhetho lolu lugcwele inkethabetshabi. Njengoba nje elizweni leli kungavamanga ukhetho kubikwa ukhetho lolu luzakuba ngolwesithathu kwele Saudi Arabia njengoba kuke kwaba leminyaka engu-40 kungavotwa kusukela ngo-1965 kwaze kwayafika u2005.
UMthunywa uzwe ukuthi umbono wokuvumela abesifazana ukuba baphatheke kwezemithetho wafakwa yinkosi umuyi uAbdullah ethi omama bakhaliphile njalo balamazwi akhaliphileyo njalo bayenelisa ukubonisa isilisa nxa siphambanisia.
Inkosi le ingakabhubhi kubikwa yakhetha omama abangu-30 baba ngabokubonisa inkokheli zeShura Council.
Ngakho-ke ngoMgqibelo kuzakuba kulezihlalo ezingu-2 100 ezizabe zivotelwa kuthi ezingu-1, 050 zizakhathwa ngesivumelwano esivela enkosini.
Impumela yalolukhetho kubikwa izakwethulwa ngoMgqibelo ntambama. Kusenjalo abesifazana beSaudi Arabia balokhu bethwele nzima ngokungavunyelwa ukuphatheka kwezinye izimiso lemisebenzi etshiyeneyo.
Imisebenzi le igoqela ukungavunyelwa ukutshayela imota, ukuhamba kungelasivumelwano lomuntu ongaba ngumzali wakhe, ukungavunyelwa ukuthathwa kungelamvumo yabazali, ukungahambi emphakathini bengagqokanga ingubo ezivala kusukisela ekhanda kusiya enyaweni, ukuxoxa lendoda engasosihlobo sakhe emphakathini, kanye lokwehlukana lendoda lula njengokwenziwa yindoda.
Omama laba babevunyelwa kuphela ukuvota kukhetho oluphansi hatshi olwezombusazwe, ukuhlala kuShura Council nxa bengabakhethwe ukuzobonisa kukhansili, ukungena kuCorporate Executive, ukusebenza kuhulumende emisebenzini efana lobugqwetha, kanye lokubanjwa ngamandla ukuba bendiswe besasebancane njalo kungakhathalekile ukuthi banganani. — Ubulembu
