uMthunywa
YiNtatheli kaMthunywa
UNATION Dube engabe watshotshozela unozinti wamaWarriors uTatenda Mukuruva ukuthi avuzise egedini kumidlalo elandelayo kodwa umqeqetshi lo uqina ngokuthi kazake abheje kumbe abophe iqhinga lokuthengisa imidlalo yeqembu lamaWarriors.
Umsekeli weqembu lamaWarriors lo ukhulume lokhu ngesikhathi ebuzwa ngembiko yokuthi ulesandla kudaba olusegudwini lokuthengiswa komdlalo womkhankaso weAfrica Cup of Nations phakathi kwamaWarriors lesizwe seSwaziland okumele udlalwe ekupheleni kukaMbimbitho.
UDube usegcotshwe ngokufanayo loEdzai Kasinauyo ilunga leZimbabwe Football Association eletheswa icala lokukhokhela enzikini yokubheja ngeqembu lesizwe.
Kulembiko ejiyileyo eqale ukwazakala kuliviki ukuthi uDube engabe wasebenza labadlali abathile ukuthi badlise iZimbabwe kumidlalo njalo amahemuhemu aphuma lasemahofisini eZifa athi abadlali ababalisa unozinti uMukuruva balobufakazi bokuthi bancengwa ukuthi bafundele ukuthengisa imidlalo.
IZifa isadingisisa ngalokhu. UDube ekhuluma eseHwange uthe ukuqanjwa kwebizo lakhe yimihlolo kuye.
“Angazi lutho. Ngikubala kumaphephandaba ukuthi mina ngiphakathi kwabantu abacatshangelwa ukuthi babheja ngethimu yesizwe. Ngimangele ngilapha. Yimihlo le,” kutsho lumqeqetshi ngoLwesithathu.
U-Kasinauyo lo usemiswe umsebenzi kuZifa njalo kavunyelwa ukuphatha loba yini emayelana lenguqu yakuleli kuze kucazululwe udaba lolu.
UKasinauyo labanye bakhe bacatshangelwa ukuthi basebenze ngudlu lezigilamkhuba eziseSouth Africa ukuthi amaWarriors anqotshwe.
NgoLwesithathu ekuseni kukhitshwe imbiko evela ehofisini yeZifa eveza ukuthi ngaphandle kuka-Kasinauyo, bakhona abadlali labaqeqetshi abalenhloso yokubheja, baphiwe imali ngokuthengisa umdlalo wama-Warriors lesizwe leSwaziland.
Abanye abalakho ukubanjwa kulelicala ngabadlali ababalisa unozinti uGeorge Chigova, uPartson Jaure lo-Ian Gorowa owayengumqeqetshi wama-Warriors.
Ekhuluma loMthunywa ngoLwesithathu, umaqhuzu weZifa uJonathan Mashingaidze uthe konke okumayelana lodaba lolu sekumelele umongameli wabo uPhilip Chiyangwa ozanikeza isinqumo nxa esecetshiswe zinhlanganiso zeCaf leFifa.
