Bayakhala abatshova amabhayisikili

09 Nov, 2023 - 00:11 0 Views
Bayakhala abatshova amabhayisikili

uMthunywa

Lovemore Dube

ABATSHOVA amabhayisikili bakhala ngokungabikhona kwemijaho ebhadalayo eZimbabwe.

Lokhu kuvele ngesikhathi kulomjaho weNedbank Tour de Great Dyke, lapho okuncintise abantu abangu-100. Umjaho lo usukele eSelous kumgodi we-platinum oweZimplats ngoLwesine ngeviki edluleyo.

Batshove baze bayakuthi ngqe eZvishavane ngoMgqibelo. 

Kulanga lakuqala balala eKwekwe ngemva kokutshova umango ongange 140km okwamahola ayisikhombisa. Kwelesibili batshova 106km baphumula eShurugwi emgodini we-Unki Mine. Baqhubeka ngoMgqibelo baze bayawugqiba umjaho eZvishavane.

Kwabangumdlalo omkhulu owasekelwa ngamankampani abalisa iEconet, Utande, OK Zimbabwe, Sterling Hotel, Exide.,Blakefield Lodges, Mimosa, Unki Mine leZimplats.

UNkulumo Dube ongomunye wabatshova kubanga lalabo abaphila ngalumdlalo, uthe kuyadanisa ukuthi kuleli umdlalo wabo kawubhadali. 

“Ngumdlalo osegazini labanengi kodwa okubuhlungu yikuthi kwelakithi kayikho imincintiswano elemali. Sitshovela ize. Siqhubeka siphatheka kuwo lumdlalo ngoba siyawuthanda, lanxa ungabhadali. 

“Silethemba nxa kungavukwa kusasa sokuthiwa usulemali, sibanengi esingawuphakamisa laphandle kwamazwe. Ilizwe lakithi lingaphakama kwezemidlalo. Bakhona abalesiphiwo sokutshova amabhasikili abasakhulayo abafisa labo ukuthi bakwenze lokhu, baphinde baphile ngakho,” kutsho uDube.

UDube uke wabayitshantshu okweminyaka emine njalo lakhathesi uhlezi phezulu labanye abatshovayo ababalisa uRodrick Shuma ophakathi kwentshantshu zakuleli.

UDube uthe amabhayisikili omdlalo wabo ayadula njalo lokuwagcina kunzima.

“Ibhayisikili elihle elilungele ukutshovwa emncintiswaneni lithengwa ngemali ephezulu. Ingqobe isekuthini sithenge njani lawo mabhasikili ngoba abiza i-US$1 500 kusiya ku-US$45 000.

“Nxa singathola abazimeleyo kumbe osomabhizimisi abangasiphathisa, uBulawayo kunye lelizwe umdlalo ungaphakama lathi siziphilele ngamathalenta ethu,” kutsho uDube.

Umjaho weNedbank Tour de Great Dyke ubungowobungane.

Abatshova amabhasikili bathe umdlalo odluleyo ubaphathise ekuzilolongeni, kulungiselelwa imidlalo ezayo eSouth Africa, Botswana leZimbabwe.

“Ukuze lathi siphile sesitshova kumazwe esingcelelane lawo. Singaphuma ijumo kwesinye isikhathi sibuya lathi sibambile. Kodwa ngabe minengi imidlalo esiholisayo ekhaya ngabe abanye bethu abangelamisebenzi bayaziphilela.”

UDube ubetshova lamajaha eqembu lakhe elibizwa ngokuthi yi-Siyephambili.

Share This:

Sponsored Links