uMthunywa
ABADALA bathi okumnandi kuyaphindwa lani bakaMthwakazi liyakwazi ukuthi iphephandaba likazulu lidume ngokubuya lezimnandi. Namhla siphethe amadoda amabili avutha bhee kwezomculo. Siphethe uFrancis Tsuro lo odume ngokuthiwa nguFraz lo Sir Palmer asebephinde benza abadume ngakho ku Houz Kwaito music ngengoma yabo uVimba. Laba baziwa ngengoma yabo ethi Seqamabhilidi.
Ungazizwela kungxoxo phakathi kwentatheli uJohas Moyo (MJ) lengcitshi kwezomculo uFraz lo Palmer (FP).
MJ: Ngamafitshane tshelani abalandeli benu ukuthi lingobani lakhulela ngaphi njalo lidume ngani.
FP: Mina nguFraz ngazalwa mhlaka 11 kuZibandlela ngomnyaka ka 1992 koBulawayo ngakhulela khona.
Ngafunda eMilton Junior ngasengisiya qedisa imfundo yaphezulu eHerentals College. U Sir Palmer yena uzelwe mhlaka 16 Nkwenkhwezi ngomnyaka ka 1993 eMasvingo eMwenezi wahlakanipha ehlala logogo emakhaya wazofunda imfundo yaphansi eMkhithika eyaphezulu eHerentials College laye lapha ko Bulawayo.
MJ: Tshelani abalandeli benu ukuthi laqalisa nini ezokucula njalo lahlanganiswa yini okwenza lisebenze ndawonye.
FP: Ezokuhlabela saziqala ngomnyaka ka 2007 kodwa besehlukene njalo sike sakhupha izingoma ezehlukeneyo omunye ekwelakhe icele labangane bakhe. UPalmer wakhupha idlalade lakhe lakuqala ngalowo mnyaka 2007 elingenzanga kuhle kodwa waqinisela waze wenza ngcono ngo2010. Phakathi kwethu sesakhupha amadlalade amanengi sihlabela labantu abehlukeneyo.
MJ: Landise ukuhlabela lingaphi njalo selake lahlabela labobani abadumileyo?
FP: Sandise ukuhlabela kumicimbi eyehlukeneyo lapho okujabulwa khona ngoba sithanda ukujabulisa abantu.
UDJ Tira aze avakatshele kuleli yithi esavula umdango njalo kuze kubuye uZahara kwabanjalo futhi. Siyake siyehlabela endaweni ezifana labo Harare, Zvishavane, Beitbridge njalo kuviki ezayo sizabe siseVictoria Falls sijabulisa abantu.
MJ: Yini abalandeli benu abangayikhangelela kini njalo lithembisani ngomculo wenu?
FP: Sithembisa ukuthi njengoba sikhuphe ingoma ezimnandi kunyanga yonale kabakhangelele okunengi. Sifuna ukukhipha ingoma ezaduma ukwedlula uSeqamabhilidi abanengi abacabangela ukuthi yaculwa yiBig Nuz yona iyingoma yethu.
MJ: BathinI abantu ngomculo wenu njalo likhuthazani kwabanye abacula iHouz Kwaito music?
FP: Abantu bayawujabulela njalo bayasisekela kwezomculo besifisela ukuthi siqhubekele phambili ngomculo.
Sikhuthaza njalo abanye ukuthi sisebenze kuhle ndawonye singabandlululani njalo siqhubekele phambili sijabulisa abantu.
MJ: Tshelani abalandeli benu ukuthi bunzima bani elihlangana labo njengabaculi njalo zifiso bani elilazo ezingathuthukisa umculo wenu.
FP: Sihlangana lobunzima obukhulu ikakhulu kuleli ngoba abantu abalaleli umculo wakuleli. Balutshwana abakwenzayo lokhu. Yikho okubangela ukuthi abanye bacabange ukuthi uSeqamabhilidi ngowe Big Nuz yona iyingoma eyaphekwa yithi khonapha koBulawayo. Abantu bakuleli bayeyisa njalo bayadelela abaculu okwenza ezomculo zingaphumeleli ngokupheleleyo. Ngabe abaculi bakuleli bayaxhaswa bathuthuke njengokwenziwa kwamanye amazwe abaculi. Abaculi bamanye amazwe bayahlonitshwa yikho nje bephila impilo emnandi. Okunye njalo yikuthi imali yokuthi abaculi bakuleli benze amavidiyo amahle kayikho. Esikudingayo njengabaculi nje yikuthi sisekelwe ukuze umculo wethu uyephambili.
