uMthunywa
USATHUKILE umdeni wakoNgcobo eMatikwe, eNanda, otshiselwe umuzi ngumphakathi ngoba kusolwa ugogo wakhona ngokuloya.
UNkosikazi Buselaphi Ngcobo (77) usakhungathekile ngokuhlaselwa ngumphakathi waze waphuma ngesamagundwane ngoLwesihlanu ekuseni ngoba ephephisa impilo yakhe watshiya abazukulu abahlaselwe ngumphakathi ocine utshise umuzi ngoMgqibelo emathathakusa.
UMnumzana Ayanda Myende ongomunye wabazukulu obelele endlini etshisiweyo, uthe bavuke sekunuka uphethroli. Uthe uvuse abanye ngoba esizwa umsindo wamalunga omphakathi akade bebemeza bethi “awutshiswe umuzi womthakathi”, kodwa baphuma ngomunye umnyango babaleka bayadinga usizo. Indlu uthe itshe yonke lempahla ebeziphakathi.
“Okungiphatha kubi kakhulu yikuthi sileminyaka sihlala kule indawo futhi sizwana ngoba singumphakathi omncane kakhulu, kodwa indlela esihlaselwe ngayo iyangethusa ukuthi abantu bakithi sebaphenduka baba ngabantu abalolunya olungaka.
“Ngibonga ukuthi ugogo ubaleke waya ezihlotsheni kuselesikhathi ngoba ukube ubekhona endlini ngobusuku esihlaselwe ngabo angiboni ukuthi ubezokwazi ukuphuma kulo umlilo. Lamanje asikasazi isizatho sokuthi baze basole ugogo ngento embi kanje,” kutsho uMyende.
Uthe okumphatha kubi kakhulu yikuthi kulezingane ezincane ezibone into ebuhlungu kanje isenzakala ngakibo. Kuzakuba nzima ukuthi ziphinde zikhululeke emphakathini okade uzama ukuzibulala.
Okhulumela amapholisa KwaZulu-Natal, uCaptain Nqobile Gwala, uthe amapholisa asenkambeni yeNanda aphenya icala lokutshiswa komuzi. — Ubulembu
