uMthunywa
Nomthandazo Ndlovu lo Ethel Ndlovu
KULEMULI yakoSivalo, eNkayi ekhotha imbenge yomile nanko phela ithwaliswe nzima ngondofa abahlala beyihlukuluza ngendlela ezitshiyeneyo emzini wayo mihla lemihla.
Ondofa laba kubikwa baqala ukuhlupha ngenyanga kaNhlolanja lonyaka njalo sebenze imuli kaMxolisi Sikhosana yaphelelwa ngamaqhinga okuthi yenze njani ngabo.
Ngesikhathi intatheli zivakatshile zizibonele ngawazo amehlo abakoSikhosana bekhala ngemithanithani yabondofa nanko phela bathe belungiselela ukuphekela intatheli lezi impuphu yamane yanyamalala.
Ekhuluma loMthunywa uNkosazana Sithembile Maphosa oyisakhamuzi sakule indawo uthe okwenzakala komakhelwane wakhe kunzima.
“Mina angikaze ngikubone okunjengalokhu, kuqala ukwenzakala sasisithi mhlawumbe kukhona abakwenzayo njengoba impahla zonke zendlini zazivuka ziphandle kukanti hayi ngondofa abakhiphele impahla phandle.
“Mina ngathi ngingena emzini kaMxolisi ngahlangana lemiganu, amacansi lemibheda kubekwe phandle kubekwe kuhle sengathi kucecisiwe, lenkomo kuyazivalela abantu basale bemangele,” kutsho uNkszn Maphosa.
Omunye umakhelwane walapho othe nguMawabayi uthe loba kuthiwa abantu bayacecisa kodwa okwenziwa ngondofa laba kuphambili.
“Mina ngathi ngivakatshile sikwejisile nje umntwana elele kwenye indlu kwamphakamisa kwambeka phansi kwakhiphela impahla zonke phandle emini libalele.
“Sithe sibuza umntwana ukuthi uzweni wathi uzwe into iphongukumphakamisa wajumeka wabona indlu ingasela lutho,” kutsho uMawabayi.
“Lempuphu kuyathatha kuhambe, sebehlala bethenga impuphu. Lemiganu kaNaNoNo emitsha asanda kuyithenga kuyayithatha kuyebeka phandle egedini,” kuchaza uMawabayi.
Ebuzwa ngodaba lolu uMnumzana Mxolisi Sikhosana ongumninimuzi uthe akusamesabisi okungondofa lokhu sekujwayele njalo akulimazi muntu.
“Mina akusangimangalisi okwenziwa ngokuyizinto lokhu, engikudingayo ngumuntu ongasikhiphela khona kuphela.
“Kuqala ngangisithi ngabantwana abakhiphela phandle impahla ngelinye ilanga sahluthulela sahlala endlini eyodwa lemuli yami yonke kodwa sithe siphuma sathola sokukhiphele phandle impahla yonke kwacecisa,’’ kutsho uMnu Sikhosana.
Ebuzwa ngodaba lolu uSobhuku wakule indawo uMnumzana Thabani Sikhosana njalo engubabomdala kaMxolisi okucatshangelwa ukuthi ondofa ngabakhe uphike wemba phansi ukuthi ngokwakhe.
“Ngiyakwazi sibili ukuthi kulezinto ezithwalise umakhelwane wami nzima kodwa ukuthi ondofa bakhona ngabami hayi ngamanga, asobami, angilandofa mina,” kuphetha uMnu Sikhosana.
