uMthunywa
Bongani Ndlovu
KULAMADODA amathathu agwetshelwe ukuyapika ejele iminyaka eyisithupha ngamunye esebenza nzima kulandela ukuthumba lokutshaya umngane womunye wabo kanye lokuzama ukumbulala bemsola ngokutshontsha imali.
Abasolwa abathathu belokitshini leMakhandeni koBulawayo, uDumisani Mpofu labomakhelwane bakhe, uInnocent Sibanda loMoses Ngwenya bamiswe phambi komthethwandaba weTredgold kuviki ephelileyo besetheswa icala lokuthumba lokutshaya balimaze uMnumzana Nkosilindile Nkala ongumngane kaMpofu bemcabangela ukuthi utshontshe i$500.
Umtshutshisi kucala leli, uMnumzana Jethro Mada ubikele inkundla ukuba mhlaka 25 Mfumfu nyakenye ngehola lika 11 ebusuku umsolwa wahamba endlini kamamangala wafika wamethesa icala lokutshontsha imali yakhe.
Inkundla izwe ukuba uMpofu labomakhelwane bakhe bangenisa umamangala emoteni baqonda egangeni leRichmond lapho abafika bambopha izandla ngentambo, baqala ukumtshaya ngemvubu ngaphambi kokuba uNgwenya athathe ibhakede lamanzi le-20 litres amfake ikhanda phakathi.
Kubikwa baqhubeka besithi agiqike phansi indawo engaba yi50 metres ngaphambi kokuba bamnike intambo yokuba azibophele.
UNkala eseyale ukuzibulala uMpofu wathi uzambulala yena wakhipha ingqamu esikhwameni ngaphambi kokuba abanjwe nguNgwenya esemgwaza intamo.
Kubikwa uNkala wenelisa ukuphunyuka wayakwelatshwa esibhedlela seMpilo.
Umantshi bekunguMnumzana Joseph Mabeza.