uMthunywa
Cornelius Luphahla
IMADOLONZIMA imuli yakoMudimba eTshiludungu emngceleni weBinga leGokwe ngemva kokuba omunye umntwana wemuli le eqe enqoleni yenkabi wawela phansi wafa.
Isiga lesi senzakale ngoMvulo kuyonale iviki ephelileyo lapho uGodwin Mudimba oleminyaka yokuzalwa engu-16 eqe khona enqoleni wahle wafa okudale ukuthi unina uNkosazana Miriam Ndlovu athi uhlungwe ngumakhelwane wakhe esenzela ukumenza umatholwane.
UMthunywa uxhumane loMnumzana Shadreck Ndlovu ongumalume walo umntwana obhubhileyo wathi kalamathe ngokubhubha komntwana lo. Yena wayekhokhele inkabi.
“Angilankani ngokufa komzukulu wami njalo lokhe kungisolisa ukuthi kwahamba njani.
“Isimanga yikuthi ngangikhokhele inkabi ngezwa umntwana engimemeza ngamisa inkabi wabeseqa esiyawela phansi wahle wafa.
“Ngathi ngibuza omunye wakhe ababegade bonke inqola wathi uthe ubone inyoka enqoleni kodwa yena kazange wayibona.
“Lokhu kusuka kungisolise sibili ngoba akulamuntu ongabona inyoka kuthi lo agade laye angayiboni,” kutsho uMnu Mwembe.
Ekhuluma lentatheli uMnumzana Ben Mudimba onguyise walo umntwana uthe kenelisi ukukhuluma okunengi ngoba usasebuhlungwini kodwa obulele umntanakhe uzambona.
“Mina ngisakhala okwamanje ngoba umntanami ufe kabuhlungu njalo ngizwa ubuhlungu kakhulu.
“Noma kunjalo obulele umntanami uzangibona sibili ngoba ngiyazi ukuthi ubulewe,” kutsho uMnu Mudimba.
UNkosazana Miriam Ndlovu ebuzwa ngale indaba uthe kukhona okutshaya amanzi ngokufa komntanakhe.
“Umntanami wabulawa ngumakhelwane wami engingeke ngamqamba kodwa kuviki ephelileyo uke wacatsha sayamthola emzini wakhe ethi ulamalanga amabili ehlala kuye.
“Into eyangimangalisayo yikuthi wayemgcineleni engamlethi yena esazi ukuthi siyamdinga.
“Isimanga njalo esaba laso yikuthi sathi simbuza ukuthi ubehlala ngaphi wathi ubehlala labafana abafitshane endlini kamama lo.
“Noma kunjalo uzangibona ngoba ngeke ngidlelwe umntwana ngithule,” kuphetha uNkszn Ndlovu.
