uMthunywa
NGATHI ngelinye ilanga ngivuka ekuseni ngathi nje ngivula umsakazo engiwuthandayo ngezwa udaba oluhlasimulisa umzimba lutshwaqise igazi lihlobe njengobubende, ngahle nganikela ukuyathenga iphephandaba ngoba ngizabala ngiphindaphinde ngize ngizwisise.
Kwakulodaba lwendoda ebulele umkayo ngokumgwaza ngomkhonto qede yabasa ibibi yambasela okomuntu ofusa intungo zokwakha umkulu.
Watsha qhu waba ngumlotha. Indoda le, bathi yathi ikhohlwe izihluthulelo (amakhiye) emsebenzini yasiphenduka endlini isiyawathatha kulapho eyadibana lensindabaphenduli, impicabadala, yathola umkayo etshaye amangqetshane enqunu lomakhelwane.
Phela babeziqethukele kukhanya ukuthi basaphumula kade ikhalile ingungu. Ekuqaleni lundoda wayethi mhlawumbe uyaphupha ebona leso simanga, okwamthelela ulaka ngamandla yikuthi ubazi lawe abantu basedolobheni bathi bebona esephendukile bahle balunguza ngamafasitela abanye bama emdulini ngoba bekwazi ukuthi kuvuka impi efana leyamaJuda lamaPhilestina, wavela wasangana, wadideka loba esenza lesisiga wayengasayedwa wayesembeswe nguDiyabholosi uqobo lwakhe.
Wathi eqeda ukwenza lowu mhlola kazange abaleke, wazisa emapholiseni wabotshwa kuthe mzukwana egwetshwa waphiwa ithuba ngumantshi ukuthi ngabe kambe elakho afuna ukukukhuluma engakagwetshwa, waqala ngokuxolisa ngobubi abenzileyo kodwa wacina ngokuthi wayengakholwa ukuthi umkakhe angamenza isihluku esinjalo sokuthandana lenye indoda embhedeni wakhe awuthenga ngalokhu okubizwa ngondlebezikhanyilanga (lay-by).
Waze watshela umantshi ukuthi bekungcono ukuthi umkakhe ngabe wakhetha ukuthakatha kulokuthi anike umthombo wakhe wamanzi amanye amadoda.
Lasendulo umfazi ongathembekanga emtshadweni wakhe wayebiselwa kibo ngoba kwakungenzeka azale umntwana ongasuye walapho ekhaya kuhluphe nxa sekuthethelwa emadlozini esetenywa ngezangelo ezingayisizo.
Ngaze ngakhumbula omunye umngane wami wathi umkakhe ephume phandle wamxolela kanti sezidalele isifo senhliziyo, phela isilonda sakhona asipholi, sibhibhidla njalo wayethi nxa etshayela ucingo lukamakhalekhukhwini nxa lungala ukungena kwezinye isikhathi ifoni yakhe ingela mlilo kumbe kungela magagasi emoyeni yena ahle acabange ukuthi mhlawumbe uyicitshe ngabomu esenzela ukuthi engaphanjaniswa kumishikashika yakhe.
Umdala wami uDlomo wayesithi: “kungcono uthathe umfazi ongadabuli ngubo kulalo ozaphenduka insengwakazi engumesisi yona esengwa ingelamchilo.” Ngiyangizwe abanye omama abendileyo sekuze kuthiwa kukoNaMphahambe ngoba engancitshani lemfuko yakhe, kodwa yazi ukuthi mhla kuyovela kuzachitheka igazi. Ayixabene.
