uMthunywa
Ethel Ncube
BAPHAKATHI kobunzima abazali beSilobela ngemva kokuba izulu lesiqhotho libhidlize isikolo lamabhuku abafundi okubangele ukuba basale befundela phandle.
UMthunywa uzwe ukuthi eLeopardess St James Primary kuthethwe uphahla lwamakilasi kwathi amabhuku okubala angaba lentengo elingana i-$700 adabuka kanye lawokubhalela angu-208.
Ekhuluma lentatheli uNkosazana Melody Sibanda ongumzali uveze ukuthi isiqhotho esibekhona sibhidlize isikolo lesi.
“Kwaba yinhlanhla ukuthi abantwana basebehambile emakhaya, babezalimala. Isikolo silahlekelwe yimpahla yokufundisa ebiza imali enengi,” kutsho uNkszn Sibanda.
Uqhubekele phambili echaza ukuthi izulu leli belilomoya omkhulu.
“Bekulesavunguzane kwasukuma uphahla lwayawela le amakilasi asala ekhamisile, amafasiteli kangikhulumi afile, kumele kuthengwe amatsha.
“Abantwana sebefundela phandle ngaphansi kwezihlahla ngenxa yomonakalo owenzakalayo,” kubika uNkszn Sibanda.
UMthunywa uxhumane lesinye isakhamuzi uMnumzana Muzi Maduma ochaze ukuthi abakwazi ukuthi bathini ngengozi yezulu le.
“Sihambe sayabona akula ngitsho ibhuku elibambekayo elokubala ikakhulu awabafundi abakubanga lakuqala.
Elesithupha kanye lelesikhombisa konke kusele kuzimvuthu.
“Sikhuluma nje abaselazo izingwalo zokubhalela ngenxa yezulu leli. Sekufundwa nzima lemali iyasihlupha lapha ukuthi kuzanywe ukulungiswa. Sicela ukuncediswa ngempahla yokufulela ukuze abafundi bafundele emakilasini njengoba kungathi izulu liyana.
“Sicela njalo uncedo lwamabhuku okubala ukuze abafundi bafunde kuhle,” kuphetha uMnu Maduma.