uMthunywa
Langelihle Moyo
BEKUNGABIZWA ozwayo eSibayeni indawo yokuzithokozisa eseMatshobana koBulawayo ngoMgqibelo, lapho iHouse Kwaito Movement ebisenza khona umcimbi we2nd edition, ithokozelela ukuphumelela kweKasi to Kasi Tour.
Basele bejabulile abalandeli beHouse Kwaito Movement, ngoba bekulabahlabeleli abanengi bakoBulawayo abagoqela i-Asante Mo, Novuyo Seagirl, Boocy, Mawiza, Mzistoz, Mfanafuthi, DJ Skaiva kanye loDJ Sida.
Ukwenziwa komcimbi lo kubonise uzulu kanye labahlabeleli bakoBulawayo ukuthi koNtuthu abantu bayenelisa ukuzithokozisa kuqhunsa ama-local artistes kungela abanye abaphandle ababiziweyo. Lokhu kwenza ama-local artiste azizwe eyamukelekile.
DJ Sida.
UMthunywa uxhumane lomunye wabahlabeleli laba uArch Hadebe oyingxenye ye-House Kwaito Movement oveze ukuba umcimbi lo bekuyindlela yokuthakazela ukuvakatsha kwabo emalokitshini atshiyeneyo.
“IKwaito House Movement yenze umcimbi wehlandla lesibili i2nd edition kulandela impumelelo ye Kasi to Kasi Tour. Uthe imicimbi le yenzelwa ukwakha ubudlelwano phakathi kwabahlabeleli labandeli. Ukuhamba siqhunsa emalokitshini atshiyeneyo sikwenza ngoba sifuna abantu basazi ukuthi singobani njalo siphetheni hatshi ukuhlala besizwa izingoma zethu kodwa abazihlabelayo bengabazi njalo bengakaze bababone,” kulandisa uArch.
Uqhubekele phambili echaza ukuba njengabahlabelelli bathanda ukubonga usekelo abaluthola ebantwini.
“Sithanda ukubonga usekelo lwabantu bemalokitshini atshiyeneyo, bayasixhasa kakhulu ngendlela ezitshiyeneyo njalo nxa kuthe kwaba lomcimbi abekeli ukuza ngobunengi babo bezosiphakamisa.
IKwaito House Movement ngeyelokitshini njalo abanikazi bavela emalokitshini kungakho sigxila kakhulu ebantwini abahlala emalokitshini. Sithi kuzulu lingadinwa lakusasa lathi sizaqhubeka sililethela izingoma ezimnandi,” kuphetha uArch.
