uMthunywa
Ncekwenhle Ncube
NGENXA yokuswelakala kwemisebenzi elizweni kulamajaha endaweni yeKopa esigabeni seNyathi asesungule iphurojekithi yokutshaya izitina ukuze bathole imali yokuziphilisa.
Iphurojekithi le isungulwe ngoMbimbitho kuwonalo umnyaka ngemva kokunanzelela ukuthi abantu abanengi bayakha ngakho izitina ziyafuneka ngobunengi bazo elokitshini leNyathi kanye lemizini yeKopa eyakhiwayo.
Elinye ilunga lamajaha la asungula iphurojekithi le uMnumzana Khumbulani Mgutshini uchaze ukuthi okubafuqe kakhulu ukuthi baqale loluhlelo lokutshaya lokuthengisa izitina yikuswelakala kwemisebenzi eqondileyo yikho bekubone kungcono ukwenza imisebenzi yezandla ukuze baziphilise empilweni.
“Siqale iphurojekithi le ngoba sinanzelela ukuthi indawo yeNyathi isathuthuka njalo abantu abanengi bayakha. Kungakho sibone kukuhle ukuthi sitshaye izitina siqale ukubathengisela khonapha eduze kulokuthi bayezithenga koBulawayo.
“Sathi sikhangele sabona imali enhle okwamagama njengoba lemisebenzi eqondileyo ingabonakali kulezi insuku,” kutsho uMnu Mgutshini.
Iphephandaba lixhumane loMnumzana Trust Sibanda ongomunye walabo abaphatheka kuloluhlelo ochaze ukuthi okunye okwenze iphurojekithi le yaba yimpumelelo yikuthi amanzi letshebetshebe kuseduze ngoba kuledamu njalo labo bayabambisana njengeqembu.
“Amanzi lenhlabathi yokutshaya izitina lezi kuseduze, lokhu kwenza kubelula nxa sitshaya izitina zethu njalo kulula nxa sesizithela amanzi ukuze ziqine.
“Akufani labasemadolobhemi abathenga inhlabathi njalo babhadale lamanzi kodwa okuqakathekileyo yikubambisana njengeqembu,” kuchaza uMnu Sibanda.
Noma nje iphurojekithi le ikhanya iyimpumelelo kodwa babhekane lodubo lokucitsha kwedamu lapho abazuza khona amanzi njalo baswela izimota eziqondane labo ezokuthwala izitina zabo zisiya kubathengi.
Ukhansila wakule indawo uMnumzana Meluleki Sibanda uchaze ukuthi umsebenzi owenziwa ngamajaha la uyancomeka kakhulu ngoba betshengisa ukuthi ngabantu abalesifiso sokubona indawo yakibo ithuthuka. Ubuye njalo wakhuthaza abanye abantu abatsha ukuthi bafunde ukuzisebenza ukuze benelise ukuziphilisa kulokuthi bayetshontsha lokudlala amakhasi okungenza bebotshwe.
“Amajaha la enza umsebenzi oncomekayo kakhulu njalo kungumqondo omuhle hatshi lokhu okwenziwa ngabanye ontanga abacina bekhuthuza abantu ngoba bethi akula msebenzi.
“Ngithemba abanye abafana bazafunda ukuthi imali iyadingwa ngazo zonke indlela ikakhulu kulezi insuku lapho okuvumayo ukuthi ubani lobani enelise ukusungula eyakhe iphurojekithi,” kuphetha uMnu Sibanda.
