uMthunywa
Charles Dube
UNgenzile kamehli uSilobile ngoba lanxa esetshelwe amagama anzima nguSekaSolani ukuthi bangalayeli uSilobile eceleni katshiyani laye nxa uSilobile esesuka elokitshini endlini kaSekaSolani esesiya sebenza eSabhabha.
UNgenzile uphetha ngokuthi uzakuzombona ngoLwesihlanu. USilobile akungakuthakazeleli lokhu yikho nje engaphenduli.
Wathi efika kumlungu wakhe, owayesengunina phela, waqonda endlini yomlungukazi ngemva kokuba eseyiphosele phansi imitutu yakhe kwamthabisa umlungukazi kaSilobile ukuba wayesebuye lempahla zakhe ezomsebenzi ehlala khonapho, lokhu kwakunika umkhumbulo okuthi engabe wayesinqobile isitha sakhe esinguNgenzile.
Kodwa ngemva kwesikhathi kuyalela ukuthi waphinda waba yintwala kaNgezile uSilobile.Nxa ubala ugwalo lolu usiya phambili akumangalisi lokhu ngoba igama likaSilobile litsho khona ukuloba lokhu phela uSilobile walandela uNgezile emtshiyisa umsebenzi wobumisi esiyamfundisa ngokuphila ethengisa umzimba.
Lamanye amankazana asebenza kubomesisi amhleka nxa engekho yena uSilobile osebizwa ngumlungukazi wakhe ethi nguLizi.
Sizwa oJesi loNeli bebuzana ukuthi sebayangaphi ubumisi bukaSilobile nxa esetshona ehohobisana lomfana weGwamazula angamaziyo ubuntu bakhe. Umfana lo kwakuthiwa nguHlanganisa.
Wathi abelungu bakhe uSilobile besemsebenzini laye eseqedile imisebenzi abeyenza wayikhona kugobhozayo okwakwenzakale izolo.
Wabalemibuzo eminengi eyamehlelayo uSilobile enjengale. Aluba kavukanga ngolaka uSekaSolani ngani izele nkomo bani?
Ngabe abaphansi abamnyangisanga uNgenzile bamephula inkophe, ngabe ungaphi?
Ngabe uvumile wayengwa nguNgenzile ubezasila ngani, waqala ukungena kuye umbuzo othi kanti yena uNgenzile usila ngani.
Uyithatha ngaphi imali yokukhwela imota kokuphela?
Ntambama nxa abanye bekwejisa yena uyathi nya uyabe eye ngaphi?
Uyabe ahambe lobani ephelekezelwa ngubani nxa esebuya?
Wehlulwa yini uSilobile ukuxexebuka kuNgenzile yena eseselethuba lokufikelwa yimicabango emihle kangaka, okusobala yikuthi nxa wayesiba lemibuzo enje wayebubona ububi bukaNgenzile. Isimanga yikuthi kuthiwa kwaqala ukungena kuSilobile ukumesaba uNgenzile.
Kodwa kwehlula ukuthi azixakulule njani kuye, lokhu phela nguye owayemlethe lapha.
Kwakubelula ukuthi uSilobile axakuluke kunina loyise.
Wayexakuluke kunina owamthwala inyanga ezithobamunwe munye, unina owaguliswa nguye insuku ezinengi, unina ongalenyanyanga ilindle lakhe, unina owayedonsa ngomlomo amakhovulana akhe nxa evimbene, unina owayesithi umchanywana wakhe ngamathe pho angehluleka njani ukuxakuluka kuNgenzile iganu ahlangana lalo esitsheni.
Kodwa! Kulula ukuxakulula kokuhle, ingcino enamathisela ububi emuntwini ilukhuni. Ingoma idinga isando ukuze ihlakazele.
Ububi buyamgagadlela umuntu nxa esedinga ukuhlubuka kubo abuyele ebuhleni. Ubuhle abugagadleli.
Yikho bebanengi kangaka abaxexebuka masinyane.
Nanko-ke ububi bukaNgenzile bugagadlela kuSilobile waze waphinda wathamba njalo uSilobile waba yintwala yakhe bahambelana.
Wayesejayele ukulala uNgenzile aluba unina kaSilobile wayengalanga ukuthi kulale isilisa endlini kaSilobile ngabe bamqamela kwaba njengendlini kaSekaSolani.
