uMthunywa
YiNtatheli kaMthunywa
UTAPFUMANEYI Muzarabani owabotshwa lomkakhe elokitshini leMahatshula koBulawayo kunye labanye ababili ngokutshontsha incingo ze-copper, kuvele ukuba wake wabotshelwa icala elifanayo ngomnyaka ka2014.
Lokhu kuvele ngoLwesibili emthethwandaba weTredgold, lapho abane laba akade besetheswa icala lokutholakala belencingo ze-copper ezibiza imali engangeUS$131 000 endlini akade beloja kuyo.
Umantshi, uMnumzana Joseph Mabeza uzwe ukuthi uMuzarabani watholakala elecala elifanayo emthethwandaba wePlumtree ngomnyaka ka2014.
UMuzarabani wetheswa icala lokutshontsha incingo ze-copper ndawonye lomkakhe uTracy Ncube, uAlan Mudjiwa loHebron Chiyangwa.
Abane laba bakhangelelwe ukuphenduka emthethwandaba mhlaka 2 Mabasa bevela ejele ngemva kokuncitshwa ibheyili ngenxa yobukhulu becala labo. Umtshutshisi, uNkosazana Siphiwe Mhlanga uthe abane laba banganikwa ibheyili bangekela ukuphenduka emthethwandaba, ngesizatho sokuba icala ababhekane lalo liphambanisa intuthuko yelizwe, okwenza libe lesigwebo sokuyapika ejele.
Abane laba babhekane lamacala amane. Elokuqala ngelokutholakala belencingo ze-copper bengelachence lokwenza lokhu, elesibili ngelokutholakala belempahla esetshenziswa ekuhambiseni amagetsi, elesithathu ngelokutholakala belempahla esetshenziswa koLoliwe kuthi elesine ngelokutholakala belempahla esetshenziswa kwezokuxhumana.
