uMthunywa
Intatheli kaMthunywa
KULABANGANE bomunye umufi eMutoko abenze umhlola esililweni nanko phela banathise isidumbu i ‘hot stuff’.
Udaba lolu kuthiwa soluhluphile ngoba losikomitshi wakulindawo uthe labo abenze lokhu kumele bamiswe edale.
Lesi simanga senzakale ngemva kokutshona kuka Simon Vhera oleminyaka yokuzalwa engu-38 obehlala labazali bakhe elokitshini leRed Bricks enzikini yedolobho leMutoko, lo okuthiwa isidumbu sakhe sanathiswa umagwebu yilabo ayejayele ukunatha labo.
Kubikwa abantu ababesemfeni baqala ukuzwa into eqoqodayo phakathi kwebhokisi lomngcwabo okwakutshengisa ukuthi kulomuntu ophilayo phakathi bathi bevula bathola isidumbu sivule amehlo lomlomo.
Abantu laba kubikwa bavusa isidumbu basihlalisa khonapho ebhokisini kulapho ke isidumbu esanathiswa khona isigodokhaya ngabangane bomufi.
Ngemva kwalokhu kubikwa izihlobo lalabo ababelapho baqala ukuphikisana ngokuthi isidumbu sizangcwatshwa njani njengoba abanye babesesaba ukungcwaba umuntu ophilayo. Usobhuku Nyamakupa uEdward Muzengeze uyayigcizelela indaba le.
“Indaba yokuthi kulomuntu ofe wavuka wasenathiswa utshwala ifikile endlebeni zami. Imuli le bekumele ibuye kimi izokhuluma udaba lolu kodwa ayizanga.
“Ngizathumela izikhulu zami kuleyomuli, ngifuna babuye edale bazochasisa indaba yabo ngokugcweleyo,” kutsho usobhuku Nyamakupa.
Ubike ukuba esiqintini seMutoko esikhokhelwa ngabakoShumba Nyamuzihwa, akula muntu ovumela abantu ukuthi badlale ngesidumbu njengalokhu okuthiwa kwenzakala.
“Le yindaba yakuqala lapha engizayidlulisela enkosini yalapha eMutoko. Kodwa abantu laba sizababizela edale esikhathini esincane esilandelayo.
“Sizwe kuthiwa basingcwaba isidumbu, emathuneni akhona kwenzakala amasalamusi futhi lapho kuthiwa kwabonakala inyoka engazakaliyo ukuthi ngumhlobo bani.
Kuthiwa isidumbu lesi sawa ebhokisini sayawela egodini. Kunengi okukhulunywayo ngendaba le okufuna ukuthi imuli le izikhulumele yodwa,” kutsho usobhuku Nyamakupa
Umufi kubikwa wayenatha utshwala wasesifa ngemva kokugula etshaywa likhanda wahanjiswa esibhedlela seMutoko wafika watshona khona.
“Ababesemfeni yibo ababuya bangitshela indaba le besithi isidumbu lokhe sisekhaya, abantu baqala ukuzwa kuqoqodwa ebhokisini elalilesidumbu.
Kubikwa abantu bavula ibhokisi bathola isidumbu sivule amehlo lomlomo bacabanga ukuthi umufi usevukile. Abangane bomufi basebenathisa isidumbu utshwala,” kutsho usobhuku Nyamukapa.
Abantu ababesemfeni kubikwa ngokwethuka babiza umfundisi welinye ibandla wakuleyondawo okubikwa wala ukukhulekela isidumbu ngoba abantu bethi umufi uvukile.
Imota eyayithwele ibhokisi lomngcwabo kuyiwa emangcwabeni kubikwa yabanjelwa emhlabathini owomileyo kwamangalisa abantu yaze yafuqwa ukuthi iphume.
Njengomuntu owayenatha utshwala isidumbu sabhodiswa emabhawa endaweni yeMutoko sibonwa ngabantu.
“Ngezwa kuthiwa isidumbu sahanjiswa epulazini lemuli leyo bangcwaba ebusuku okuyinto engavunyelwayo lapha.
Ngesikhathi bengcwaba kubikwa kwabuya inyosi zaphazamisa abantu kodwa zangabalumi,” kutsho usobhuku Nyamukapa.
Isikhulumi samapholisa eMashonaland East uInspesctor Simon Chazovachii uthe, “Indaba yesidumbu esanathiswa utshwala ayifikanga kibo.
“Kulicala ukudlala ngesidumbu loba ithuna lomuntu,” kutsho uInsp Simon Chazovachii egqiba inkulumo yakhe.
