uMthunywa
Zintatheli zikaMthunywa
ZILOKHU zinkemile izakhamizi zeNkulumane 11 koBulawayo ngemva kokuba kutholakale umzimba womunye ujaha kusuweji ucuyiwe.
Indaba le yenzakale kuyonale inyanga lapho umuyi uAllington Bhebhe etholakale engelazandla, inyawo lesisu ngemva kokucatsha kwakhe inyanga ezifika eziyisikhombisa.
Intatheli ixhumane lesinye isakhamuzi esiveze ukuba indaba le yenzakala.
“Ujaha lo wabizwa ezigayweni zeKelvin lapho ayesebenza khona kumhlaka 14 kunyanga yokuqala yomnyaka kaphendukanga, kwayabikwa emapholiseni ukuba usecatshile lemsebenzini lapho ayebizwe khona bathi kafikanga.
“Kukhona okutshaya amanzi ngokufa kwakhe, bakhona abalesandla lapha loba bengakaveli, umuntu abizwe emsebenzini qede kasabonakali vumbu setholakala ecuyiwe.
“Izitho zakhe zomzimba zayangaphi njalo zathathwa ngubani?Akwazakali labengalo yomthetho bathule ngakho, umuyi useze wangcwatshwa umzimba ungaphelelanga,” kubika uNkosazana Moyo.
UMthunywa uxhumane lomunye welunga lemuli oziveze ngokuthi nguPortia nje kuphela ochaze ukuba behlelwa ngumnyama.
“Indaba le inzima kakhulu njalo ayizwisiseki ukuba ihamba njani. Umuyi wasuka lapha esiya emsebenzini kaphendukanga, sahlala izinyanga sezwa sesibizwa ngamapholisa kuthiwa sizokhangela umzimba kamuyi emfuleni wengcekeza.
“Sahamba sathola yiso isihlobo sethu siyandenda phezulu engelakhanda, izandla, inyawo isisu konke okwangaphakathi kungekho lakhonapho eduze asikutholanga size sambeka nje izitho zakhe zingekho njalo asikezwa ngitsho udletshana ukuthi kuhamba njani. Sizwa ubuhlungu ngesiga lesi, silemibuzo eminengi ngalokhu,’’ kubika uPortia.
