uMthunywa
Ethel Ncube
IZAKHAMIZI zeGumtree Plantation eLuveve, koBulawayo zithithibele ngokutholakala kwesidumbu sowesifazane okubikwa wabanjwa iganyavu qede wahilelwa ngebhulugwe ayeligqokile ngoMvulo kuyonale iviki.
Kubikwa ukuthi isidumbu sikaLinda okungatholakalanga isibongo sakhe lalapho ahlala khona satholwa sivalwe ngamahlahla njalo kubikwa ukuthi wayengagqokanga lutho ngaphandle kwebhodi nje.
UMthunywa uzwe ukuthi amapholisa eMagwegwe athola ucingo oluvela emuntwini ongazange athande ukuziveza ukuthi ungubani esithi aye eGumtree azathola isidumbu sowesifazane lakanye afika asithola.
Intatheli ixhumane lomunye owabona isidumbu sikamufi ngesikhathi amapholisa esithatha, uMnumzana Shingi Dube ochaze ukuthi kuliqiniso ukuthi kulomuntu owatholakala efile kulindawo.
“Esakubona kunkazana lo osedlule akukhulumeki. Wayesesabeka engakhangeleki, ubuso bugcwele igazi. Ukubamazi asimazi ukuthi ngowangaphi kodwa isihluku esinjalo sizwisa ubuhlungu. Wayenguye njengokuphuma kwakhe esiswini elaliswe eceleni komgwaqo intamo ibotshiwe ngesinye sezigqoko ayesigqokile, lokhu abakuthi ngama-leggings.
“Iphenti lakhe laliseceleni kwakhe khonapho okukhanya ukuthi uqale wadlovwa engakabulawa. Eduze lapho akekho owayemfanisa. Amapholisa athatha isidumbu ahamba laso,” kutsho uMnu Dube.
Uqhubekele phambili waveza ukuthi lokhu kuyamangalisa njalo kuyethusa ukuthi lo ntombazana wabulawelani.
“Akula loyedwa owezwa umuntu ehlaba umkhosi ebusuku kumbe wabuya labantu bevele sebemdlovile bambulala akucaci ukuthi kwahamba njani,” kutsho uMnu Moyo.
Ekhuluma loMthunywa omunye owafika ngesikhathi amapholisa efika uMnumzana Peter Ndlovu ubike ukuthi abakubona ngamehlo kuyabasinda.
“Ngilokhe ngimadolonzima ngengakubonayo umuntu abulawe shuwa anqunulwe esale enguye nje. Kukhanya wabulawa watshiywa eceleni komgwaqo kwavalwa ngamahlahla yena evele engakhangeleki egcwele igazi ebotshiwe entanyeni kumbe wakhanywa akula okwaziyo,” kutsho uMnu Ndlovu.
UMthunywa uxhumane lesikhulumi samapholisa koBulawayo uInspector Precious Simango oveze ukuthi kakho ehofisini.
“Okwakhathesi angikho ehofisini, tshayela ucingo ehofisini ubuze abakhona,” kutsho uNkszn Simango.
UMthunywa uxhumane lamapholisa eLuveve avumileyo ukuthi bathwala umuntu owabulawayo owatholakala eduze leGumtree Plantation eLuveve kodwa bebengakabikwazi ukuthi ngowangaphi.
