uMthunywa
Ncekwenhle Ncube
AMAQEMBU adlala kuligi yenguqu eseNyathi eyaziwa ngokuthi yiNyathi Football Association (Nyafa) aseqalile amalungiselelo emidlalo ezadlalwa ngomkhosi wokuthakazelela amaqhawe akuleli.
Imidlalo le ikhangelelwe ukuthi iqhutshwe mhlaka 11 kusiya ku-12 Ncwabakazi.
Umqhudelwano lo uzabiza amaqembu alitshumi lanhlanu njalo abaqoqi balumkhosi webhola likanobhutshuzwayo babike ukuba bacabange ukuthi basebenzise inguqu ukutshengisa indlela isigaba seNyathi esithakazelela ngayo amaqhawe aletha uzibuse kuleli.
UGideon Sibanda ongumsekeli kamgcinisihlalo weNyafa uchazele iphephandaba likazulu ukuthi sebeqalile amalungiselelo.
Uthe amaqembu onke angaphansi kweligi yethu azaphatheka emncintiswaneni lo asefakiwe kumaqula lapho abazaqalisa ukukhankasela ukuyafinyelela ama-final njalo phakathi kwamaqula la bakhangelele ukuthi kuphume amaqembu amabili ayiwo azadlala kuma-quarter finals.
“Konke okumele kwenziwe sekulungile. Sesihlelile yonke into njengoba kungasinsuku zingaki ukuthi sidlalele linkezo yomkhosi wamaqhawe. Amaqembu siwahlele aba ngamaqula amane njalo kulamaqembu amane khonapho.
“Sikhangelele ukuthi ngeSonto ezayo amaqembu ethu azaqala limidlalo njalo phakathi kwamaqembu lawa azadlala kube lamabili ayiwo azadlala kuma-quarter finals,” kuchaza uSibanda.
Kuzwakele ukuthi amaqembu onke azaphatheka kule inkezo kumele abhadale i$5 ezabavumela ukuthi bangene kulumncintiswano. UMthunywa uzwe ukuba iNyafa yona izancedisa nge$200 ukuze labo abanqobe amaqembu onke benelise ukuzuza imvuzo.
Intatheli ixhumane lonobhala wama-fixture uMnunzana Paulos Moyo yena ochaze ukuthi bazanxusa abaqeqetshi bamaqembu aphezulu ukuzonanzelela abafana abaleziphiwo.
“Konke sesikulungisile, osekusele yikuthi sinxuse abaqeqetshi bamaqembu aphezulu ngoba sifisa ukuba babone ukuthi bakhona abadlali abalamandla eNyathi,” kuphetha uMoyo.