uMthunywa
Buhlebenkosi Gaule
ABALIMI sebekhuthazwe ukuba baphange bavune izilimo zabo esezivuthiwe ukuze bangalahlekelwa yisivuno sabo.
UMnumzana Alpha Ndlovu uthe abalimi bakhuthazwa ukuthi baphangise ukuvuna emasimini abo ngoba umkhathi lo oselizweni wenza umuhlwa uhlasele izilimo zabalimi abanengi.
“Kulabo abalimi abalezilimo esezivuthiwe kungabakuhle uma bangaphangisa ukuvuna bengazekeli zilokhu zisemasimini. Endaweni ezinengi zelizwe umuhlwa usuqalile ukudla izilimo ikakhulu endaweni zeHwange kungakho kuqakathekile ukuba bakhiphe konke okusemasimini kungakahlaselwa” kutsho uMnu Ndlovu.
Uqhubekele phambili wathi abalimi okumele baqaphele ukuthi izilimo zabo azihlaselwa ngumuhlwa ngabahlala endaweni ezingatholi izulu elinengi.
UMnu Ndlovu uthe ngaphandle komuhlwa isikhathi lesi silakho njalo ukubiza ezinye izinanakazana ezingabhidliza izilimo.
“Abalimi kumele bahlale besazi njalo ukuthi ngaphandle komuhlwa izilimo zabo zilakho ukuhlaselwa yizibungwana ezithile kungakho ke kuqakathekile ukuthi badinge usizo lezeluleko ngaloluhlupho kubalimisi abaseduzane labo.
“Kulezinye izibungwana ezidla izifuyo zabalimi ezinjengama aphids. Abalimi balakho ukuthenga imithi etshiyeneyo ukuze babulale izibungwana lezi baphinde bavikele izilimo zabo kuzibungwana lezi, phezu kwalokhu kumele benanzelele ukuba zikhona indlela ezingabaphathisa ngaphandle kwemithi ngoba kwezinye izikhathi imithi layo ingabulala izilimo ngamazwi kaMnu Ndlovu la.
Uthe abalimi bayenelisa ukufaka umquba emasimini abo ngoba esikhathini esinengi amagenga aqala ngokudla umquba engakahlaseli izilimo kungakho-ke nxa kulomquba ensimini amagenga acina esidla wona angabe esadla izilimo.
UMnu Ndlovu uphethe ngokuthi kumqoka ukuthi abalimi bazame ngazo zonke indlela ukuvikela izilimo zabo ukwenzela ukuthi bathole isivuno esingcono loba kube lohlupho lwezulu elizweni.