uMthunywa
YiNtatheli kaMthunywa
UMANGOYE uselala eziko enkambeni yethimu yeHwange FC ngoba abadlali abaholi lutho, okuyikhona okwenza abadlali behluleke ukudlala okuhlabusayo, kubika uMebelo Njenkwa.
Umqeqetshi weChipangano lo ubikele iphephandaba likazulu kuliviki ukuthi kunzima kuye ukuqeqetsha abadlali abalambileyo. Ukuveza kwakhe ngendlala yabadlali sekunathiswana ngakho itiye edolobheni leHwange lapho abasekeli bezimbamgodi abasola lumqeqetshi ngoba bethi usevala ukuthi uyehluleka.
UNjenkwa uthe kungaphezu kwamandla akhe ukuthi akhuze abadlali abacabanga ngenkalakatha yemali okumele bayihole kodwa ingekho.
“IHwange ingaze inqobe kweminye imidlalo, akutsho ukuthi abadlali bathabile. Senginanzelele ukuthi nxa singanqoba, akusoke kufane kumidlalo elandelayo. Ngazibuza ukuthi lokhu kwenziwa yini ngathola ukuthi kubangelwa yindlala abalayo,” kubika uNjenkwa.
Ulandule umbono wabasekeli wathi umsebenzi wakhe uyawazi njalo ulabadlali abazingcitshi.
“Akulalutho engiluvalayo lapha. Abadlali bahlutshwa yikuthi balendubo ezikhangelane lokuswelakala lokuphuza kwemali yabo. Silabo abadlali abaziwayo ukuthi bazingcitshi.”
Uthe inkinga zalithimu azisoze zenze icine isehluleka ukugcina indawo kuligi.
“Sikhona kuligi. IHwange FC izahlala ibalelwa kumathimu amakhulu kunguqu yeZimbabwe. Okuhlupha iqembu kuzalungisiswa njalo sizaphenduka sibeliqembu elinganqotshwa lula,” kutsho lumqeqetshi obone iHwange idliwa sathimu encinyane 3-0 liqembu leTsholotsho kumdlalo wokugqiba ihlandla lakuqala leligi yeCastle Lager.
Amathimu la ayadibana futhi ngeSonto sekuvulwa ihlandla lesibili enkundleni yeColliery.
UNjenkwa ubambe isihlalo sikamqeqetshi wezimbamgodi zamalahle kulandela ukumiswa umsebenzi kukaNation Dube ecatshangelwa ukuthi wabheja ngethimu yesizwe amaWarriors lapho ayengumsekeli kamqeqetshi.
Ukungabi khona kweholo labadlali beHwange kubangelwa yikungaqhubi kuhle kwenkampani yeHwange Colliery eyiyo ekhangelane lenhlelo zamathimu angaphansi kwayo.
Imidlalo yeCastle Lager ekhona kulimpelaviki:
NgoMgqibelo: Chicken Inn v Harare City (White City), How Mine v Border Strikers (Luveve), ZPC Kariba v Dynamos (Nyamhunga), Mutare City Rovers v Chapungu (Sakubva).
NgeSonto: Highlanders v Caps United (National Sports Stadium), Bulawayo City v FC Platinum (Luveve), Hwange v Tsholotsho (Colliery), Triangle v Ngezi (Gibbo).
