uMthunywa
Cornelius Luphahla
ZIBAMBE oluphuphumayo izakhamizi zelokitshini le-Old Lobengula edolobheni lakoBulawayo ngemva kokuba amadoda amabili abehlala lomfazi munye egwazane enye yaze yathwalelwa esibhedlela, uMthunywa uyakuveza lokhu lamhlanje.
Impi le yenzakale kuviki ephelileyo lapho, uMnumzana Fortune Gwebu agwaze khona uMnumzana Michael Ndlovu ngemva kokuba sebehlale iviki ndlu nye lomkabo, uNkosazana Roseline Sibanda.
UMthunywa uzwe njalo ukuthi uNdlovu wathi efika esibhedlela wabaleka.
Kuzwakale ukuthi ngemva kweviki abathathu laba behlala ndawonye babuya bedakiwe ntambama okwadala ukuthi uNdlovu agwaze uGwebu ethi kasamfuni endlini.
UMthunywa ukhulumisane loMnzumzana Brian Marupi wathi impi le yenzakale ngemva kokuba uGwebu esevela ejele ebotshelwe ukugwaza umuntu.
“Eminyakeni emibili eyadlulayo uGwebu waxabana loMaSibanda wagwaza umntakadadewabo esifubeni okwadala ukuthi abotshwe ayevalelwa okweminyaka emibili ejele. Ngesikhathi esejele uNdlovu wasala ethandana lomkakhe.
Wathi ephuma ejele bafika bahlala bonke bobathathu endlini kaMaSibanda.
“Ngemva kweviki behlala bonke sezwa umsindo sebesilwa sathi sifika sathola uNdlovu esegwaze uGwebu. Ngathi ngibuza ukuthi kuhambe njani uNdlovu wathi uGwebu ubemxotsha endlini yena kunguye othenga ukudla njalo kunguye owasala egcine uMaSibanda ngesikhathi esejele,” kutsho uMnu Marupi.
UNkosazana Luba Mangena oyisakhamuzi sakule indawo uthe uGwebu wabaleka esibhedlela wabuya wathi kalankani ngamadoda la ukuthi ayehlala njani ndawonye lomfazi.
“UGwebu wathi ngemva kokugwazwa samthwalela esibhedlela seMpilo kodwa wabaleka esibhedlela lakhathesi kasikwazi ukuthi ungaphi. Noma kunjalo mina okungimangalisa yikuthi amadoda la ahlala njani ndawonye lomfazi munye ngoba lokhe ngazalwayo kangikaze ngikubone lokhu,” kutsho uNkszn Mangena.
Ebuzwa ngale indaba uNkszn Sibanda uvumile ukuthi wahlala lamadoda amabili ndawonye wathi kodwa khathesi usehlala loyedwa noma nje kungayisuye amthandayo.
“Kuliqiniso sibili ukuthi ngake ngahlala lamadoda amabili endlini yami kodwa khathesi ngihlala loNdlovu kuphela njalo ngesikhathi besilwa kangibabonanga ngoba ngangidakiwe. Noma kunjalo mina ngithanda uGwebu futhi uNdlovu ngamtshela ukuthi ngilendoda yami ngesikhathi engikhombisa.
“Ngalokhu uGwebu engabuya ngizaxotsha uNdlovu ngoba ngamtshela ukuthi ngilendoda,” kutsho uNkszn Sibanda.
Ebuzwa ngale indaba uMnu Ndlovu uvumile ukuthi yenzakala wathi yena ngeke aphawule nxa uGwebu engabuya kuzaphawula uMaSibanda.
“Kuliqiniso sibili ukuthi sahlala ndawonye loGwebu kanye lomkami kodwa khathesi kakho. Okunye njalo mina ngesikhathi sisilwa ngangidakwe kakhulu kodwa kangizange ngamgwaza wawela phezulu kwensimbi yamgwaza.
“Ngalokhu uGwebu engaphenduka mina ngeke ngakhuluma lutho uMaSibanda nguye ongaphawula ukuthi siyaqhubeka sihlala sonke yini kodwa mina konke ngiyakwamukela,” kutsho uMnu Ndlovu.
Imizamo yokukhulumisana loMnu Gwebu yehlule umkakhe uthe kalanombolo zakhe zikamakhalekhukhwini.
