uMthunywa
YiNtatheli KaMthunywa
KUDABA olwaba yindaba egudwini eSamlodi eGwanda sokuvele ukuthi sokulokungazwani phakathi kwamalunga emuli okucatshangelwa ukuba yiyo eyabulala umntwana yamenza umatholwane.
Kuzwakale ukuthi ngemva kokuba imuli yakoMsimanga isiluthe bhadla udaba lokubulawa komntwana emphakathini, yabizwa enduneni ukuze kuvele egcekeni ukuthi kwenzakalani.
Imuli yakoMsimanga yamiswa phambili kwedale lenduna uNhlamba ngoMgqibelo kuviki ephelileyo ngesizatho sokuthi bachaze iqiniso enduneni ngokufa kukaBevern Malunga.
Okwabangela ukuthi indaba le iyefika enduneni yikuthi uBill Msimanga walanda abakomalumakhe kamuyi wachaza ukuthi umntanabo uyaphila njalo ufisa babuthane ukuze achaze lapho akhona.
Kubikwa enduneni abakoMsimanga babikelwa ukuthi kabaveze ukuthi kwakusenzakalani.
Umfakazi obikele uMthunywa uMnumzana Siyafa Gumede owayekhona ngelanga kuthoniswa indaba le uveze ukuthi kwabaluthuli emulini yakoMsimanga ngoba basebekhombana ngeminwe.
Uveze ukuthi ngesikhathi abantu sebethe gwaqa ukuze bezwe ukuba kwahamba njani ngomntwana abahlala bebabaza ukuthi uyaphila kwabalukhuni ngoba imuli le yasijikelana inyoka ephilayo.
“Abantu babona ibhayisikhopho yamahala kuleyondawo ngoba imuli le yasiphongukhombana ngeminwe ukuthi lo nguye owambulalayo.
“UBill lomnawakhe uFanyana basebelokhu bephoselana amagama omunye esithi lo kaveze ukuthi umntwana wambeka ngaphi, kuthi omunye laye athi ngomunye,” kuchaza uMnu Gumede.
Kuvele ukuthi uBill watshela idale elalithe gwaqa ukuthi umntwana wathathwa nguFanyana wamsebenzisa ukuthi abengumatholwane wakhe encedisana lendodana yakhe esebenza edolobheni leGwanda.
UMthunywa uzamile ukukhulumisana lomunye wemuli yakomalumakhe kamuyi uSilibaziso Nyathi yena oveze ukuthi bona bahamba enduneni ngenhloso yokuthi bazi ukuthi umzukulu wabo ungaphi njalo kungani bamenza umatholwane.
Ubuye waveza ukuthi kwabamangalisa ukubona umdeni wakoMsimanga uphikisana phambili kwenduna ngoba ngesikhathi bebika udaba lolu babesithi bazimisele ukuthi bachaze ngomntwana.
“Thina njengabomalume bomntwana esamondla emncane waze wafika kulelobanga abamthatha esekulo silesifiso sokwazi lapho okulomzukulu wethu khona.
“Silokho silindile ukuthi besitshele ukuthi umntwana ungaphi njalo sifuna akhutshwe simbone njengokutsho kwabo ukuthi ukhona,” kuveza uNyathi.
Ubuye wachaza ukuthi bazabuyela edale lenduna mhlaka-17 kuyonale inyanga lapho osiyazi abazabe behlahlula phambili kwenduna beveza ukuthi umntwana wasiwa ngaphi.
Intathelizindaba ikhulumisane lomunye womdeni wakoMsimanga uFanyana yena oveze ukuthi bahamba edale ngoMgqibelo kodwa kalisaphelanga ukuthoniswa ngoba kwaba lokuxabana phakathi kwabo njengemuli. Uveze ukuthi bazabuyela njalo ukuze inyanga ziyehlahlula ukuthi ngubani olomntwana emulini yabo.
“Sabizwa edale lenduna ukuze siyeveza ukuthi umntwana samusa ngaphi njengoba umfowethu watshela abantu ukuthi samenza umatholwane,” kutsho uMnu Fanyana.
