uMthunywa
Ethel Ncube
ZIBUHLUNGU izakhamizi zeMakhokhomba, eNyamandlovu ngesiphatho sabomongikazi besibhedlela seNyamandlovu Hospital nanko phela kubikwa omongikazi kabasananzi izigulane okubangela ukuthi ezinye izigulane zicine zisweleka zingazange zikhangelwe.
Kubikwa kulomntwana obhubhe engakhangelwanga ngomongikazi nanko phela wafika esibhedlela elunywe yinyoka kodwa waswela omkhangelayo waze wafa eselayinini. UMthunywa uzwe ukuthi omongikazi beNyamandlovu kabanaki izigulane nanko lenduna uDeli kayisalugxobi kulesisibhedlela ngenxa yalokhu.
UMthunywa uxhumane lesakhamuzi zeMakhokhomba uMnumzana Moyo ochaze ukuthi kuliqiniso lokhu.
“Umntwana lo owabhubhayo kalabazali ubegcinwa ngugogo lokhulu, walunywa yinyoka ntamabama kwabizwa i-ambulensi yabuya ngama-9 ntambama yazomthatha. Ngesikhathi bemthatha sacela ukuba babone ukuthi inyoka emlumileyo ngumhlobo bani ngoba yayilokhe ikhona esihlahleni kodwa abazange bazihluphe ngalokhu. Lokho kwahle kwasitshengisa ukuthi abalandaba lesigulane ababesithwele.
“Ekufikeni kwalo umntwana esibhedlela walala enjalo engaphiwanga lutho umzimba waze wavuvuka. Wayathola uncedo ngo-11 ekuseni ngelanga elilandelayo lapho azuza khona iParacetmol. Kuthe ngokuya kwesikhathi omunye umongikazi wathi umntwana lo kadluliselwe eMpilo uSister-in-Charge wala wathi umntwana uzasila,” kutsho uMnu Moyo.
Uqhubekele phambili waveza ukuthi kwajikelwana inyoka ephilayo ngomntwana owayefuthelwa esibhedlela.
Iphephandaba likazulu libikelwe ukuthi uchuku lwamanesi eNyamandlovu aluqali ngokubhubha komntwana kodwa yinto eyake yenzakale lasebantwini abadala.
Ekhuluma lentatheli uNkosazana Celiwe Ndlovu uveze ukuthi omongikazi besibhedlela seNyamandlovu kabalalo uthando lomsebenzi wabo.
“Akulethwe abanye engxenye abantu bangaphumula ngolunya abalwenziwa ngomongikazi laba. Induna yethu yake yalaliswa kulesisibhedlela komunye umnyaka igula kuthe sekumele idluliselwe eMpilo koBulawayo kwezwakala omunye umongikazi esithi: ‘kayekelwe lo kuvele kuselani ukuya kwesinye isibhedlela akusancedi’ bengazi ukuthi ulalele.
“Kwaba yinhlanhla ke induna yasila ayizange ibe lomqondo wokubophisa omongikazi laba kodwa ngikhuluma nje induna ayisasithandi isibhedlela,’’ kutsho uNkosazana Celiwe Ndlovu. Intatheli ikhulume lomlisa wakule indawo uMnumzana Tshakalisa obike ukuba bafisa ukuthi omongikazi besibhedlela laba basiwe kwezinye indawo.
“Isizwe sizakwanda njani nxa omongikazi bengelandaba labantu. Esikufisayo yikuthi kutshintshwe omongikazi kubuye abanye laba abasebenza kuhle nanko bekela ukwelapha umntwana ngesikhathi wacina ebhubha,” kutsho uMlisa uTshakalisa.
Imizamo yokukhulumisana labazali bomuyi yehlule ngoba inombolo zocingo zingangeni.
