uMthunywa
Ethel Ncube
LIZA ngomfutho iqembu labafana be-The Foundation Brothers Ezes’qalo elihlabela liseMzansi Afrika nanko phela selikhiphe idlalade lesibili.
Iqembu leli lilabahlabeleli ababili abathi, uBekithemba Moyo odabuka eMatobo odume ngokuthi nguMthimani omunye nguMelusi Dube owazakala ngokuthi Mdala Zebra yena edabuka ePlumtree. Bahlabela umculo weRhumba.
UMthunywa uxhumane loBekithemba Moyo oveze ukuba iqembu labo liyakhula ngempela.
“Iqembu lethu salisungula ngomnyaka ka-2022 saqala ukuhlabela sakhupha ingoma i-single track ethi wadlala ngothando sayikhupha sisanda kuqala iqembu lethu.
Ngokukhula komculo sesenelise ukuba sikhuphe elinye idlalade elitsha elilengoma eziyisikhomba isihloko sedlalade leli lithi Ulwandlo olubomvu izingoma eziphakathi zibalisa uBamkhululile, Isikhathi sisavuma, Inhliziyo Epompamanzi, Ulwadlo olubomvu, Ilangelikhulu, Wajahu mdaka loBaba kaS’lindile yilo idlalade eliphume ngeviki ephelileyo,” kubika uBekithemba.
Uqhubekele phambili eveza ukuba umculo wabo uyakhula bazaqhubeka bewukhulisa.
“Sithemba abasekeli bethu bazakholisa ingoma zethu ezikudlalade elitsha. Sibonga usekelo lwabalandeli njalo sibathembisa ukuba sizahlala sibakholisisa nge-rhumba,” kuphetha uBekithemba.