uMthunywa
Buhlebenkosi Gaule
ABABONA ngezomkhathi iMeteorological Services Department (MET department) esabelweni seMatabeleland South sebekhuthaze abalimi ukuba kufanele bazizwe belomlandu wokudinga njalo lokuthola ulwazi lokutshintsha komkhathi okwenzakala elizweni ukuze babekwazi ukuba ukuna kwezulu akusafani njengasendulo lapho abadala ababesazi khona ukuba izulu liqala ukuna nini.
UMnu Rogers Munyira ongomunye wababona ngezomkhathi uthe abalimi akumelanga bamelele abantu ukuba babatshele ukuba ezomkhathi ziya ziguquka mihla lamalanga kodwa kumele bazidingele ulwazi oluqondane lalokhu.
“Kumqoka ukuthi abalimi bonke babelolwazi olumayelana lezomkhathi nje jikelele kanye lokuguquka komumo wawo kungathalekile ukuthi umlimi ulima endaweni encinyane kumbe enkulu.
“Abezomkhathi bazimisele ukusebenzelana labalimi bakuleli ukuze ukulima kwakuleli kuphumelele.
Okuqakathekileyo nje yikuthi abalimi laba badinge ulwazi olufaneleyo ukuze babelakho ukuphumelela kunhlelo zabo zokulima, iMET department yona isilungisile ulwazi olumele lutholwe ngabalimi” kutsho uMnu Munyira.
UMnu Munyira uqhubekele phambili wathi kungenye injongo kaHulumende wakuleli ukuthi abalimi babelesikhathi njalo lezindawo lapho abazathola khona ulwazi oluqondane lokutshintsha komkhathi ukwenzela ukuba bathole isivuno esiphezulu okungaphathisa ilizwe.
Iphephandaba likazulu lixoxe lomunye wabalimisi ohlala eSolusi uMnumzana Sidalwa Maxen Moyo ochaze ukuba njengabalimi bayananzelela ukuthi umkhathi usutshintshile njalo izulu alisani ngesikhathi elalisina ngaso kudala.
“Umkhathi usutshintshile ngempela, izulu alisani njengakudala. Phela kudala sasisazi ukuthi liqala nini liyekuma nini ukuna kodwa khathesi sokunzima ukucabangela khona ukuthi sihlanyele nini.
“Phela kulezinsuku uyathi usuhlanyelile ubone nya, lize liyebuya sokutshile emasimini,” ngamazwi ka Mnu Moyo lawa.
UMnu Moyo ubuye njalo wachaza ukuba njengomunye wabalimi uyafisa ukuba babelendawo lapho abangahlonyiswa khona ngolwazi.
“ESolusi siyafisa ukuba kubelabantu abasifundisayo ngoba siyezwa ukuba umkhathi usutshintshile njalo lathi siyakubona sifuna ulwazi lokuba silime njani ukuze sithole isiqiniseko sokuthatha amanyathelo aqondileyo”, kutsho uMnu Moyo.
Abenhlanganiso yezomkhathi baphethe ngokuthi abalimi bengabalolwazi lokutshintsha komkhathi kungabanceda ngoba sebelakho ukwenza izinqumo eziqakathekileyo eziqondane lezilimo lezifuyo njalo nxa abalimi bengabalalo ulwazi olufaneleyo kuzenza bamukele inguquko leyo.
