uMthunywa
Cornelius Luphahla
ABEZOKUZITHOKOZISA koBulawayo bazadibana kube luthuli mhla wokhetho lukaMiss Africa Zimbabwe oluzakuba kuviki ezayo mhlaka 29 kuMabasa ntambama kuze kuse.
Abazathokozisa uzulu bagoqela uSandra Ndebele, uCalvin, uKhuliyo, uBabongile Sikhonjwa, uLouis Ndlovu umtshayi wengungu, uPrayer Soul, lembongi ezifana loSithandazile Dube kanye labanye abadume ngezokujabulisa uzulu bazabe bekhona besenza abadume ngakho emkhosini lo.
UMthunywa ukhulumisane lomahlekisa uBabongile Sikhonjwa ochaze ukuthi ngalelilanga uzajabulisa abantu ngendlela angakaze ayenze.
“Ngalelilanga ngizathululela uzulu indaba eziqumbaqumbayo kuzajabula ngitsho lenyoni zasendle. Yikho-ke engizethula khona ingoma zami ezimnandi kanye layonale ethandwa ngabantu ethi, Mavamaya. Yikho-ke engikuphathele uzulu mhla welanga leli,” kutsho uBabongile.
Ukhuliyo omunye wabaculi abazabe bekhona ubikele intatheli ukuthi laye uza lezimnandi azajabulisa ngazo uzulu ngalelilanga.
“Njengomculi weJazz ngikhangelele ukuthi ngijabulise uzulu ngengoma zami ikakhulu le ethi Amaph’amatsha.
Wonke umuntu ngikhangelele ukuthi ajabule azizwe esekhaya ngoba ngizabe ngilande ukuzobajabulisa kuphela,” kutsho uKhuliyo.
Imbongi yodumo uSithandazile Dube ubikele intatheli ukuthi abantu kabalungise indlebe ngoba uza lezimnandi.
“Njengoba nje kuyabe kulusuku lokuphakamisa amantombazana ngakho-ke ngikhuthaza abantu ukuthi baze lendlebe ngoba ngiza loluju lwazo. Ngizahaya inkondlo eziphakamisa amantombazana ngibakhuthaza lokuthi bakhe ikusasa yabo. Noma nje bezabe bebukisa ubuhle babo kodwa ngizabakhuthaza ukuthi bengadeli ukufunda ngoba yikho okulekusasa yabo khona,” kutsho uSithandazile.
UPrayer Soul onguye olengoma eyinsika yazo zonke ezizatshaywa lapha ubikele uMthunywa ukuthi laye uzaphakela uzulu ezimnandi.
“Njengomculi weSoul Music ngikhangelele ukujabulisa uzulu ngengoma zami eziku-albhamu ethi Prayer Soul, ikakhulu le ethi Africa okuyiyo ingoma nsika kulo umkhosi,” kutsho uPrayer Soul.
U-ambassador walo umkhosi uSandra Ndebele uchaze ukuthi ngalelilanga kuzaba yikuqala kwakhe ukuhlabela lokhe waba lomntwana.
“Mina njengoba bengingahlabeli okwalezinsuku njengomuntu olomntwana, emkhosini lo yikho engizaqala khona ukuhlabela ikakhulu idlalade lami elitsha elithi, Izenzo elilengoma ethandwa ngabantu ethi Mazhiri. Yikho-ke engizakwenzela uzulu,” kutsho uSandra Ndebele.
UMqeqetshi weFingers Academy uSarah Mpofu uveze ukuthi banengi abakundima yokuthokozisa uzulu abazabe bekumkhosi lo ngenhloso yokujabulisa uzulu.
“Emkhosini lo kuzakuba labaculi, imbongi, abadlali, abatshayi bengungu, ngeke ngibaqambe ngibaqede. Lokhu kungenxa yokuthi sifuna wonke umuntu ajabule njengoba abantu bejabuliswa ngendlela ezehlukeneyo,” kuphetha uSarah Mpofu.
