uMthunywa
Musa Janga
ZITHITHIBELE izakhamizi zeNjube koBulawayo ngomfazi lendoda abahlala eNjube uPhathisani Moyo (31) lo Philip Kawara abagwazane amehlo bebanga umholo.
Ekhulumisana lentatheli kaMthunywa uNkosazana Moyo owaziwa kakhulu ngokuthi nguMaMoyo uthe uKawara wathola umsebenzi kwenye indawo ngakho iholo lakhe lalingena ku EcoCash yakhe. Udubo lwasuka lwabakhona uKawara esenathe phose yonke imali kodwa etshiye endlini kungela kudla.
UMaMoyo onguye owagwazwa ilihlo ngumkakhe uthe uKawara vele uyakuthanda ukukhelela umagwebu.
“Umkami vele utshwala buyamphika lokuthi unathelani asazi, uyabe elungile nxa engelamali kodwa angavele ebambe imali uyahlupha kakhulu,” kuchaza uMaMoyo.
Uqhubekele phambili esithi ekuphendukeni kukaKawara esedakiwe wambuza ngemali okuyinto eyamcasulayo wahle wamdumela wamtshaya wamdabula ikhanda nge-spirit level. UMaMoyo wayeselele phansi ngenxa yokulimala kodwa kukhanya umkakhe wayelokhu efuna ukumzwisa ubuhlungu nanko phela wathatha uphini waluqamula lwasala lucijile andubana agwaze umkakhe ngalo elihlweni.
“Uthe ephenduka edakiwe ngahle ngabona ukuthi ubesiya natha leyo mali ngesikhathi ngibuza wahle wahwaqa ukuthi ngimbuzelani yikho lapha angilanda khona nge-spirit level wangitshaya ikhanda ngayo ikhanda wasethatha uphini waluqamula wangigwaza ngalo ilihlo yikho lami ngacina ngiludobha lami ngamgwaza elakhe ilihlo,” kuchaza uNkszn Moyo.
Intatheli kaMthunywa ixhumane lomamazala okunguye obekhona kusenzakala yena ovezwa ngokuthi nguMaDube nje kuphela obike ukuthi wezwa abantu betshingelana ngendaba yemali kodwa kasabonanga ukuthi kwatshaywana njani. Uthe wathola uMaMoyo evuza igazi elihlweni lekhanda loKawara laye ilihlo livuza igazi wasebiza i-ambulensi yabathwala bobabili.
“Ngangike ngabezwa betshingelana ngemali kodwa ngasengiphuma phandle ngemva kwesikhathi ngezwa umkhosi uphuma endlini, nxa ngithi ngibone okwenzakalayo ngathola uMaMoyo ikhanda lelihlo konke kuvuza igazi ngahle ngatshayela i-ambulensi masinyane,” kuchaza uMaDube.
Ekhuluma loMthunywa uPhilip ubike ukuthi kakwazi ukuthi kwahamba njani ngoba yena wayedakiwe.
“Lingixolele, mina ngangizidakelwe, ukuthi salwa njani angisakwazi,” kuphetha uMnu Kawara.
