uMthunywa
Arnold Ndlovu
KULAMADODA amathathu amiswe phambi komthethwandaba weTredgold koBulawayo esetheswa icala lokutshaya ipholisa elenhloso yokulibulala kubangwa umahotsha.
UNgqabutho Ncube (25), Langelihle Sicaba (27) loSobala Sithole (26) abahlala eMhlangeni bamiswe emthethwandaba besetheswa icala lokuzama ukubulala uBhekinkosi Nkomo (25) olipholisa eCollen Bawn eGwanda.
Umtshutshisi kulelicala uMnumzana Nkathazo Dlodlo ubikele inkundla ukuthi mhlaka 31 Mabasa ngehola letshumi, abasolwa balandela umamangala yena owayehamba lenkazana okuzwakale ukuthi nguSanelisiwe bephuma kwenye ibhawa.
Befika lapho baqala ukuthethisa uSanelisiwe besithi ulibele lendlela njalo uhambelani lomamangala.
Ngalesosikhathi baqala ukumtshaya kanye lomamangala besola umamangala ukuthi uhambelani lentombi yabo.
Inkundla izwe njalo ukuthi ngalesosikhathi baphinda babulala amambodlela bagwaza umetheswacala engalweni lasemzimbeni besebenzisa lezinye izikhali ezingaziwayo.
Ngesizatho leso umamangala wagijinyiselwa esibhedlela se-United Bulawayo Hospitals lapha afika khona walaliswa kwavulwa icala okwabangelwa ukuthi laba abathathu babotshwe.
Abasolwa abazange baphiwe ithuba lokuvuma loba elokwala icala labo ngumantshi uMnumzana Franklin Mkhwananzi kodwa udlulisele phambili ukuthoniswa kwecala kumhlaka 18 Nkwenkwezi. Abasolwa bazathoniswa bevela entolongweni.
