uMthunywa
Ethel Ncube
AZILANKANI izakhamizi zeGwabalanda, koBulawayo ngemva kokuba enye imuli ebihlala ingabantwana bodwa abalitshumi lantathu itshone yaze yalala lesidumbu somunye wabo kungela okunanzelelayo ukuthi lumntwana kasekho.
Isiga lesi senzakale ngeviki ephelileyo lapho uMbali Ndebele oleminyaka yokuzalwa engu-18 onguye omdala etshiywe labanawakhe baqeda ilanga lonke belesidumbu endlini bengazi ukuba isiscino sangakibo uNyasha Ndebele obelomnyaka owodwa wokuzalwa usebhubhile.
Usane lolu lwabhubha mhlaka 12 Nhlolanja.
Kubikwa uMbali watshiywa labanawakhe abalitshumi lambili ngunina, uSibusisiwe Sibanda mhlaka 14 Mpalakazi esiya eGoli waze waphenduka esesizwa umkhosi wokubhubha komntwana.
UMthunywa uxhumane lesinye isakhamuzi sakule indawo esichothoze isenzo sikaSibanda.
“UMaSibanda watshiya abantwana bodwa waya eGoli aluba waphangisa ukuphenduka umntwana lo wayezaphepha. Ngeke uthi ungumama uhambe uye eGoli utshiye abantwana bebodwa.
“Umama lo kuvele akumelanga ukuthi akhale, ubevele engaphi umntwana egula njalo esenzani bekulani acele esinye isihlobo ukuthi sisale simkhangelele abantwana,” kubika uNkszn Sibindi.
Omunye njalo umakhelwane okhulume lentatheli uNkosazana Glory Ndlovu uveze ukuba lokhu belesithuli ngemfa le.
“Lokhu ngiqanda emathunjini njalo ngizwela ubuhlungu laba abancane abaseleyo ukuthi bazahlukumezeka ngokufa komunye wabo ngoba vele lanxa umdala ukufa komuntu oseduze lawe kuyakuhlukuluza isikhathi eside.
“Umntwana lo, obekhangele abanawakhe umncane laye, yikho wehluleka ukubona ukuthi umntwana usedlule. Okunye okusuka kumangalise yikuthi behluleka nje ukuthi babize labo abaloja ngakibo babatshele ukuthi umntwana uyagula,” kubika uNkszn Ndlovu.
UMthunywa ukhulumisane loMbali onguye owayekhona endlini umntwana ebhubha oveze ukuba yena ubengananzeleli ukuthi umnawakhe kasekho.
“Umnawami ugule okwesikhathi esifitshane njalo mina bengimbona esengcono. Wabhubha mhlaka 12 kodwa mina ngaze ngakubona ngelanga lesibili sesivela biza omunye ugogo simbikela ukuba umntwana kasakhulumi, kavuki yikho ukusibikela ukuthi umnawami kasekho.
Imizamo yokukhulumisana loNkszn Sibanda unina womntwana obhubhileyo yehlule ngoba ebeyelungisa amaphepha omngcwabo.
