uMthunywa
Thokozile Mbedzi
ZISELE zithoba amanxeba izakhamizi zeShanyawugwe esigabeni seNhwali, eGwanda ebezilandela umkhondo wezifuyo zazo kulandela ukuhlaselwa ngamasela lawo okubangele ukuthi ezinye ziqamuke inyawo ezinye izandla.
Izakhamizi lezi, uAmon Muleya, Samuel Ncube, Faro Dube, Amkela Ndlovu, Matshetshe, Siphila Ndlovu, Nsingo labanye okungasatholakalanga amagama abo kodwa okuzwakale ukuba bahamba befika i-20 bahamba besiyalanda izifuyo zabo kumaviki ambalwa adluleyo baze bahlaselwe ngamasela lawo.
Ekhuluma lentatheli kaMthunya uMnumzana Busani Ndou uthe njengezakhamizi babezama ukulandela izifuyo zabo ngoba sezitshontshwe kanengi.
“Amadoda ahlaselwayo ngamanye alawo ayehlala etshontshelwa inkomo kungakho abambana avumelana ukuthi azilandele. Bahamba ngemota ezimbili bathi befika eTshanyawugwe bafica amadoda amanengi evale umgwaqo bathi becela ukudlula bahle baqala ukubatshaya bathi umngcele ongena eTshanyawugwe kayidlulwa ngakho bangeziyengi ukuthi bayangena.
“Amadoda la abatshela ukuthi balibonile ilanga liphuma kodwa ngeke babone ukutshona kwalo andubana baqale ukubahlasela ngamahloka lamabhemba. Amanye amadoda la aqamuka inyawo, amanye izandla njalo abanye babelimele kwezinye indawo emzimbeni ngoba bahamba bengabantu abayadinga inkomo zabo bengakhangelelanga ukuba bazahlangana lempi kaTshangani,” kuchasisa uMnu Ndou.
“Indaba yokutshontshwa kwenkomo zethu isididanisa amakhanda ngoba noma bangaze bazitshontshe akumelanga ukhulume loba uzilandele ngoba bayabulala sesicela amapholisa asukume asiphathise ngodaba lweTshanyawugwe ngoba asingeke sifuye kuhle ngoba betshontsha inkomo zethu ukusa kwamalanga.
“Abanengi basezibhedlela ngikhuluma nje bafela ukulonda izifuyo zabo,” kulandisa uMnu Ndou.
UKhansila wakulindawo uBonang Mukwena ekhuluma lentatheli kaMthunywa uthe ulokudana okukhulu njalo abantu balimele kakhulu.
“Ngilokudana okukhulu kakhulu ngilapha ngendaba eyenzakale esigabeni lapha. Amadoda ahamba esiyadinga inkomo zawo eTshanyawugwe bahle bafika babahlasela ngikhuluma nje abanye baqamuke inyawo lezandla basesimeni esibi.
“Kukhanya abantu bakuleyondawo babahlasela bendawonye labomakorokoza njalo bona babehlomile laba ababedinga inkomo babengela zikhali. Kubuhlungu nxa umuntu olesikhali ehlasela ongela. Ngicela usizo ukuba abalimeleyo laba baphathiswe esibhedlela ngoba abantu laba basesimeni esibuhlungu,” kuphetha uKhansila uMkwena
