uMthunywa
Msilisi Dube
INHLANGANISO yeAgritex iphakathi kokuqeqetsha abalimi beGweru ngokulima besebenzisa indlela ebizwa ngokuthi yi-keyhole gardening ukwenzela ukuba kulwiswanwe lodubo lwendlala emaphandleni.
I-keyhole gardening kubikwa yindlela yokulima elungele ikakhulu abantu abadala abangasenelisi ukukhothama.
Esivandeni lesi kubikwa abalimi bayenelisa ukuhlanyela imibhida, ihanyanisi, imiqwente, i-beetroot lezinye izilimo ezingenela izimuli zabo.
UMnumzana Thabani Sibanda onguAgritex Officer kulumango uthe baqhuba uhlelo lolu ukuze abalimi benelise ukulima iloba yisiphi isikhathi somnyaka.
“I-keyhole garden yisivande esenziwa embundwini owakhiwe ngamatshe lenhlabathi. Umbundu lo kumele ube mude ulingane leqolo lalowo owakhayo, ukwenzela ukuthi angakhothami.
“Umhlobo wesivande lo ulakho ukuthi usetshenziswe ngabalimi asebekhulile abangasenelisi ukukhothama okwesikhathi eside.
“Isivande lesi silusizo ngoba umlimi uyenelisa ukulima imihlobo etshiyeneyo yemibhida.
“Okudingakalayo nxa kusakhiwa i-keyhole ngumhlabathi ovundileyo, amatshe amakhulu, umlotha wenkuni, utshani obomileyo, amahlamvu, izibi ezithanyelwe egumeni, ingcekeza esuka ezihlahleni lezigodo zokubiya.
Ukuze wakhe isivande lesi kumele ube lamabhara angu-20 omquba, angu-20 omlotha lamanye njalo angu-20 enhlabathi,” kuchaza uMnu Sibanda.
UMnu Sibanda uthe okwakhathesi sebeqeqetshe abalimi beSilobela, ngemva kwalokhu bazakuya eLower Gwelo.
Ingcitshi le iphethe ngokuthi isakhiwo se-keyhole gardening siyagcina amanzi lomhlabathi uvundile njalo inhlabathi esetshenziswayo inika izilimo ukudla komquba okufaneleyo ukuze zikhule kuhle. Izilimo kumele zendlalelwe ngotshani obufakwa phezulu kwalapho okulinywe khona obuvikela inhlabathi kanye lomquba (mulching).
