uMthunywa
Cornelius Luphahla
KULANDELA udaba olwakhitshwa kuphephandaba likazulu lomphurofethi weCowdray Park eMaphayiphini owenza amasela atshontsha umbheda wanamathela sekuzwakale ukuthi kulabantu asebeveze ukuthi umphurofethi lo kumele axotshwe elokitshini leli okwenza kucatshangelwe ukuthi bengabe bengamanye amasela asehluphile kule indawo.
Kubikwa umphurofethi uMadzimayi Sarah usehlezi ephethe izibindi ngezandla ngenxa yabantu abamlanda bathi kabafuni muntu “ongumthakathi” phakathi kwabo.
Esinye isakhamuzi esikhulume loMthunywa, uMnumzana Tawanda Makoni uveze ukuthi kulabantu asebesethusela umphurofethi lo.
“Ngizwa ubuhlungu kakhulu ngoba kulabantu abagangileyo asebesethusela uMadzimayi bethi bafuna ukumtshaya njalo bafuna asuke lapha okwenza kukhanye mgceke ukuthi benzela ukusala besitshontshela kuhle njengoba khathesi ovele nje alinge atshontshe sihle siqonde kuye.
“UMadzimayi lo uyasiphathisa ngokusikhulekela basibisele impahla zethu. Lokhu abakwenzayo kubi kakhulu njalo ngeke sivume exotshwa lapha,” kutsho uMnu Makoni.
“Ngikhuluma nje ngangicatshelwe likhadi (ATM card) lami lebhanga umuntu wayazithathela imali yami kodwa ngahle ngaqonda kuMadzimayi lowomuntu ngambona sethutshile endlini yami ezoliphendukisa lemali ayeyithethe.
Yikho nje amasela la engasamfuni uMadzimayi Sarah,” kutsho uMnu Makoni.
Intatheli iphinde njalo yaxoxa lesinye isakhamuzi ebesikule indawo sidinga usizo sathi ngeke bavume ukuthi uMadzimayi axotshwe kule indawo.
“Ngeke sekele abantu behlukuluza umuntu osiphathisayo njalo ukwenza kwabo lokhu kuveza sobala ukuthi yibo kanye abantu abagangileyo esihlala labo,” kutsho uNkosikazi Sandra Tshuma.
Ebuzwa ngomsebenzi wakhe lo uMadzimayi Sarah ubikele intatheli ukuthi kakwazi ukuthi abantu bambangisani ngoba yena usiza nje abadinga uncedo kabulali bantu.
“Kangikwazi ukuthi abantu bangibangisani ngoba kangilwi lomuntu njalo kangithuki muntu ngiyasiza nje kuphela labo abadinga uncedo.
“Mina ngaqala ukuboniswa ngikuGiredi 2 njalo yikho lapho engahle ngaqala ukukhulekela abantu, kangisebenzisi muthi njalo kangibhadalisi kungakho ukuthi abantu labo ababuya lapha basolani lami kangazi lutho,” kutsho uMadzimayi Sarah.
Uqhubekele phambili esithi uyenelisa ukuphathisa abantu ababhekane lenhlupho ezitshiyeneyo.
“Ngiyenelisa ukwelapha imvukuzane, ukuqinisa umendo, ukumisa abesifazana, ukusiza abagula umkhuhlane wengqondo kanye lokwelapha eminye imikhuhlane etshiyeneyo. Abatshontshelwayo labo ngiyabakhulekela ukuthi impahla zabo ziphenduke,” kuphetha uMadzimayi Sarah.
